«Թիվ մեկ խնդիրը մնում է ապօրինի հատումները: 90 տոկոսը սոցիալական խնդիրների պատճառով է»,-այսօր ներկայացնելով անտառների վիճակը՝ ասաց «Հայանտառ» ՊՈԱԿ-ի տնօրեն Մարտուն Մաթեւոսյանը: Ըստ նրա, գյուղացին վառելիքի այլընտրանք չունի, այդ պատճառով էլ ավելի էժան վառելիքը նրանց համար փայտն է:
«Արմենպրես» լրատվական գործակալության մամուլի սրահում պարոն Մաթեւոսյանին հակադարձելու էր եկել Համահայկական բնապահպանական ճակատի անդամ Անի Խաչատրյանը:
Պարոն Մաթեւոսյանի այն պնդումներին, թե ծառահատումները հիմնականում անտառամերձ տարածքների բնակիչներն են կատարում, Անի Խաչատրյանն ասաց, որ իրենց խումբը այցելել է անտառային տարածքներ եւ հայտնաբերել, թե որքան շատ հաճարենիներ եւ հաստաբուն ծառեր են հատված եւ տարածքում թափված այդ ծառերի թափուկներ:
Անի Խաչատրյանի համոզմամբ, եթե գյուղացին սոցիալական պայմաններից դրդված մտնում է անտառ, ապա, նա ոչ թե կսղոցի հաստաբուն ծառերը` իմանալով ինչ պատասխանատվություն է նրան սպասվում, այլ` կհավաքի այդ թափուկները, որոնք կտրատված ծառերի մնացորդներն են:
Կարդացեք նաև
Մարտուն Մաթեւոսյանն ասաց, որ մեկ անտառապահի պահպանության տակ գտնվող տարածքը կազմում է 700-1000 հեկտար. «Մեկ անտառապահը, նաեւ տեխնիկական հնարավորությունների բացակայության պայմաններում, հնարավորություն չունի, պատկերացրեք կա գիշեր, որի ընթացքում իրականացվում են անտառահատումները»:
Սրան ի պատասխան, Անի Խաչատրյանն ասաց, որ երբ բնապահպաններն են այցելում տարածք գիշերով, անտառապահը «հրաշքով միանգամից հայտնվում է եւ թույլ չի տալիս առաջ գնալ»:
Պարոն Մաթեւոսյանը բնապահպան ակտիվիստին, որը ոգեւորված պատմում էր, թե ինչպիսի խոչընդոտներ են առաջացնում անտառապահները, երբ բնապահպանները փորձում եմ գնալ սղոցների ձայների հետքերով, հորդորեց ցածր խոսել. «Մի գոռացեք, սա անտառ չէ»: Մարտուն Մաթեւոսյանի եւ Անի Խաչատրյանի փոխադարձ մեղադրանքները՝ տեսանյութում
Aravot.am-ի հարցին, թե անտառի հաշվեկշիռը խախտվելու դեպքում ինչպիսի բնական աղետներ են տեղի ունենում, ասուլիսի մասնակից Հովիկ Սայադյանն ասաց, որ աշխարհի մի շարք երկրներում` Մալայզիայում, Ինդոնեզիայում, Բրազիլիայում, որտեղ մեծամասշտաբ ծառահատումներ են իրականացվում, սողանքներ են լինում:
Հայաստանում, ըստ մասնագետի, Իջեւանի Վազաշեն գյուղի տարածքում սողանքների հետեւանքով մի քանի տնտեսություն դիմել են կառավարություն, ստացել են փոխհատուցում` այլ վայրում տուն գնելու. «Խնդիրը նրանում է, որ դա ավելի շատանալու է եւ շատանալու է կլիմայի փոփոխության ֆոնին: Կլիման դառնում է ավելի չորային, որովհետեւ, երբ անտառը հատում ենք, խոնավության եւ հողի դիմադրողունակության հարաբերակցությունը գնում է հօգուտ սողանքների եւ սելավների ակտիվացման»:
Անդրադառնալով Սյունիքում տեղի ունեցած անտառահատումների դեպքին, որի մասին ահազանգել էին Համահայկական բնապահպանական ճակատի անդամները` ներկայացնելով լուսանկարներ, Մարտուն Մաթեւոսյանն ասաց, որ այդ տարածքները «Հայանտառի» հետ կապ չունեցող տարածքներ են եւ որ մասնավորապես այդ հատումները եղել են Կապանի տարածքի անտառներում:
Մարտուն Մաթեւոսյանն ասաց, որ այդ տարածքները ականապատված են եւ հնարավոր է ականազերծման նպատակով են այդ ծառերը հատվել:
Լուսինե ԲՈՒԴԱՂՅԱՆ
