Ոստիկանապետ Վլադիմիր Գասպարյանի խորհրդականի պաշտպան՝ փաստաբան Ալեքսանդր Սիրունյանը տեղյակ չէ՝ իր պաշտպանյալը որտե՞ղ է ցմահ ազատազրկման դատապարտված Մհեր Ենոքյանի մասին զրպարտող տեղեկություններ հրապարակել:
Հիշեցնենք, որ Մհեր Ենոքյանը պնդում էր, ոստիկանապետի խորհրդականը facebook-յան գրառմամբ իր մասին զրպարտիչ տեղեկություններ է տարածել:
Փաստաբան Սիրունյանը հետաքրքրվեց՝ ինչո՞ւ հենց երկու միլիոն դրամ է պահանջել փոխհատուցում, Ենոքյանն ասաց, որ եթե ավելի շատ սահմանված լիներ զրպարտելու համար, ինքը կընտրեր առավելագույն չափը, որովհետեւ իր պատիվն ու արժանապատվությունն անգնահատելի են:
«Դուք վերջում ձեր խոսքում ասացիք՝ գոնե գրեին մեր կարծիքով, եթե facebook-ում այդ մի բառը՝ իմ կարծիքով, գրեին, վե՞րջ, էլ չէի՞ն լինի զրպարտող»,- հետաքրքրվեց պարոն Սիրունյանը:
Կարդացեք նաև
Մհեր Ենոքյանն էլ ասաց, որ իր անձի համար էլի վիրավորական կլիներ, բայց իրավական առումով չէր կարողանա դիմել դատարան:
Պարոն Սիրունյանը նաեւ ճշգրտեց, եթե Նարեկ Մալյանի կինը վաղը թույլ չտա, որ Մալյանը facebook-ի էջ ունենա, որտեղո՞վ պետք է հերքում տարածի. «Դուք պահանջում եք՝ դատարանը պարտավորեցնի facebook սոցիալական կայքով հրապարակայնորեն հերքի, հիմա էսօր Նարեկ Մալյանը որոշում է փակել facebook-ի իր էջը, ի՞նչ ենք անելու, չունի, կինը ասում է facebook-ից դուրս արի»:
Ենոքյանն ասաց՝ նման իրավիճակում կխորհրդակցի իրավաբանների հետ:
Դատական նիստը հետաձգվեց, որ կողմերը կարողանան դատարան ներկայացնել ապացույցներ: Հաջորդ նիստը նշանակվեց մայիսի 5-ին:
Ալեքսանդր Սիրունյանը խոստացավ հաջորդ դատական նիստին ներկայացնել տեսանյութ. «Ես այն ժամանակ իրավապահ մարմիններում էի աշխատում, հիշում եմ պարոն Ենոքյանի հարցազրույցը մամուլի միջոցներում, խնդրել ենք ոստիկանությունից, որ այդ հարցազրույցը մեզ տան, որ գոնե Նարեկ Մալյանի չափ հասկանանք՝ ի՞նչ է տեղի ունեցել, այդ ժամանակ մեր բացատրությունները հստակ կներկայացնենք»:
Իսկ Ենոքյանը պնդեց, որ ինքը քսան տարի առաջ որեւէ հարցազրույց չի տվել լրատվամիջոցներին:
Արփինե ՍԻՄՈՆՅԱՆ
