«Եթե մենք սահմանեինք, որ հանրապետության տարածքը բաժանվում է ոչ թե 13, այլ 41 ընտրատարածքների, ապա այդ դեպքում կարող էինք ասել, որ նման է մեծամասնականի: Որքան մենք մեծացնում ենք ընտրատարածքները, այնքան հեռանում ենք մեծամասնական համակարգից: Դրա համար մենք ասում ենք, որ հանրապետության տարածքը բաժանում ենք 13 ընտրատարածքների: Այս դեպքում մենք հանգում ենք համամասնական համակարգի»,- այսօր ԱԺ պետաիրավական հարցերի մշտական հանձնաժողովի նիստում, պատասխանելով ԱԺ «Ժառանգություն» խմբակցության պատգամավոր Զարուհի Փոստանջյանի հարցին, ասաց ՀՀ կառավարության աշխատակազմի ղեկավար-նախարար, Ընտրական օրենսգրքի համահեղինակ Դավիթ Հարությունյանը: Զարուհի Փոստանջյանը հետաքրքրվել էր` արդյոք բաց ցուցակներով քվեարկությունը նույն մեծամասնական ընտրակարգով քվեարկությունը չէ:
ԱԺ պետաիրավական հարցերի մշտական հանձնաժողովում այսօր քննարկվում է ԸՕ-ի լրամշակված տարբերակը: Այն նախատեսվում է պատգամավորների դատին հանձնել եկող երկուշաբթի օրը մեկնարկելիք քառօրյայում:
«Ես հիմա մոտավոր թիվ չեմ կարող ասել, բայց եթե հաշվենք, ստացվում է, որ մոտավորապես 7-8 միլիոն դոլարից ոչ պակաս գումար կպահանջվի, որպեսզի մենք բոլորին անվճար նույնականացման քարտեր բաժանենք»,- ասաց Դավիթ Հարությունյանը` պատասխանելով Զարուհի Փոստանջյանի մեկ այլ հարցի`որքա՞ն գումար է հարկավոր, որպեսզի ընտրություններից առաջ բոլոր քաղաքացիներին բաժանվեն նույնականացման քարտեր և քվեարկությունն անցկացվի բացառապես նույնականացման քարտերով: Սակայն, ըստ Դավիթ Հարությունյանի, այստեղ միայն այդ խնդիրը չէ. «Եթե մենք որոշում ենք ընդունում, որ քվեարկությունը պետք է կազմակերպենք բացառապես նույնականացման քարտերով, այդ դեպքում պետք է ունենանք նաև համապատասխան սարքավորումներ, որոնք ձեռք բերելու համար ևս 5-6 միլիոն դոլար կպահանջվի»:
Պատասխանելով ընտրությունների ժամանակ բոլոր տեղամասերում տեսանկարահանում իրականացնելու եւ ուղիղ հեռարձակում ապահովելու վերաբերյալ պատգամավորի բազմաչարչար հարցին էլ, Դավիթ Հարությունյանը մանրամասնեց` տեսանկարահանումն ու ուղիղ հեռարձակումը խնդրահարույց են համարում այն պատճառով, որ որեւէ տեղամասում հեռարձակումը կարող է խափանվել, ինչը կասկածների տեղիք կտա:
Կարդացեք նաև
Նելլի ԳՐԻԳՈՐՅԱՆ
