2016թ. ամառային զորակոչի անցկացման գործընթացի թափանցիկության եւ օրինականության ապահովման, զորակոչի ընթացքում քաղաքացիների դիմումներում եւ բողոքներում բարձրացված հարցերի արագ լուծման նպատակով ՀՀ պաշտպանության նախարարի հրամանով ստեղծվել է հանձնաժողով:
Այսօր հանձնաժողովի նիստում նորակոչիկներից մեկի՝ Կարեն Մանուչարյանի հարազատները բողոքում էին, որ տղան ալերգիա ունի, մաշկը քոր է գալիս, իսկ զինկոմը որոշել է, որ նա պիտանի է ծառայության:
Նորակոչիկն ասաց, որ դեպք է եղել՝ սրսկումներից ուռել է, այսինքն, սուր ալերգիա ունի: Հարցին՝ փաստաթուղթ ունե՞ք, որ ալերգիա ունի եւ սրսկումից ուռել է՝ նա պատասխանեց. «Չէ, ատամնաբուժարանում է եղել: Տենց պետական ձեւով չենք գնացել, էլի, որ փաստաթուղթ ունենանք»:
Տղային հանձնաժողովի անդամներն ուսումնասիրեցին, բացեցին մեջքը, եղունգների հետքերն երեւում էին, մեջքը կարմրած էր:
Կարդացեք նաև
«Իրեն լավ քորել՝ եկել է, նոր քորածի հետքեր էին: Նոր քորել էր՝ կարմրացրել էր»,- ասաց հանձնաժողովի նախագահ Գեղամ Հարությունյանը:
Տղայի եղբայրը հայտարարեց, որ կենտրոնական հանձնաժողովը առանց փորձաքննելու՝ դրական եզրակացություն է տվել ու ուղարկել զորակոչի:
Գեղամ Հարությունյանն էլ առաջարկեց՝ եթե դուք նման բան եք հայտարարում, որ կա հանցակազմ, դիմեք դատախազություն: Ճանապարհը այստեղ չէ, ուրիշ տեղ է. «Մենք էլ ձեզ հետ շահագրգռված ենք, որ եթե կան անբարեխիղճ մարդիկ, որոնք կարող են առանց հետազոտելու արձանագրություններ անել, տվյալներ լրացնել՝ նրանք պետք է պատասխանատվության ենթարկվեն: Շատ շնորհակալ կլինենք, որ անեք եւ մյուս զորակոչիկներին ազատեք նման երեւույթներից»:
Հռիփսիմե ՋԵԲԵՋՅԱՆ
