«Մենք» պետական եւ ազգային արժեքների հանրահռչակման հիմնադրամի հիմնադիր և տնօրեն Պավել Սարգսյանը Aravot.am-ի հետ զրույցում չցանկացավ մեկնաբանել նոր սահմանադրության լավ կամ վատ կողմերը, քանի որ, ինչպես ինքը նշեց՝ մասնագետ չէ. «Որպես քաղաքացի միայն կարող եմ ասել հետևյալը՝ շատ զարգացած երկրներում ներկայիս սահմանադրությունն է գործում»:
Պարոն Սարգսյանը դժվարացավ նշել թերությունները՝ ասելով, որ կապրենք, կտեսնենք՝ ինչպես կաշխատի. «Մեզ մոտ միանշանակ իրավակիրառության խնդիր կա, սա նորություն չէ: Շատ լավ օրենքներ կան, որոնք պարզապես գրված են: Դա մեզանից է կախված, պետականության նկատմամբ ճիշտ վերաբերմունքից: Մեզ մոտ վատ իմաստով անտարբերություն է ամեն ինչի նկատմամբ: Եթե այդ անտարբերությունը գոնե գալիք սերնդի մոտ չփոխենք, որ իրենց պետականության նկատմամբ պատշաճ վերաբերվեն, առաջ չենք գնա»:
Հիմնադրամի տնօրենը նոր սահմանադրության հետ դեռ չի առնչվել, չկարողացավ գնահատականներ տալ. «Տևական ժամանակ պետք է սահմանադրությունը գործի, հասկանանք պլյուսներն ու մինուսները, որ գնահատական տանք: Ես առաջիններից մեկն եմ, որ կուզեմ նոր սահմանադրությունը գործի՝ սև-սպիտակ գրված տարբերակով: Մենք ունենք իրավակիրառության, անվստահության մեծ խնդիր: Ունենք արտոնյալ մարդկանց կարգավիճակ: Այս բոլորը չեն լինի, եթե հստակ բոլոր օրենքները կիրառվեն: Մեկնաբանության խնդիր էլ ունենք: Լինում է, երբ օրենքներն այլ կերպ են մեկնաբանվում»:
Արփի ԿԻՐԱԿՈՍՅԱՆ
