Այս օրերին, երբ ՀՀ կառավարությունը խոշորացույցով անցնում է բյուջեի վրայով` տեսնելու, թե էլ ո՞ր ոլորտից կարող է խնայողություն անել, Հայաստանի Հանրապետության դատավորների վճիռների պատճառով ստիպված է հազարավոր եվրոներ վճարել տուժած քաղաքացիներին: Վաղը կառավարության նիստում պահուստային ֆոնդից 3600 եվրո կհատկացվի արդարադատության նախարարությանը` քաղաքացի Թամարա Դոմազյանին վճարելու համար: Այդպես որոշել է Մարդու իրավունքների եվրոպական դատարանը` գտնելով, որ խախտվել է դիմումատուի՝ դատարանի հասանելիության իրավունքը:
Ինչպես տեղեկանում ենք նիստի օրակարգից, կառավարությունը պարտավոր է 3600 եվրոն վճարել մինչեւ 2016 թվականի օգոստոսի 25-ը: Ուշագրավ է, որ կառավարության պահուստային ֆոնդից գումարը դուրս է գրվելու «Կառավարման մարմինների գործունեության հետեւանքով առաջացած վնասվածքների կամ վնասների վերականգնում» հոդվածով:
«Դոմազյանն ընդդեմ Հայաստանի» գործը Եվրադատարանում է 2007 թվականից: Թամարա Դոմազյանը Եվրադատարանին գանգատվել է, որ զրկվել է դատարան դիմելու իրավունքից, քանի որ Հայաստանի դատարանը մերժել է ընդունել քաղաքացիական գործով իր ներկայացուցչի կողմից ներկայացված հակընդդեմ հայցը:
Ըստ գործի նյութերի՝ 2005 թ. սեպտեմբերին Թամարա Դոմազյանն ստացել է Երևանում իրեն պատկանող, սակայն ապօրինի կառուցված ավտոտնակի եւ օժանդակ շինության նկատմամբ սեփականության վկայական՝ հիմնված 2005թ.-ի հուլիսի 22-ին Երեւանի քաղաքապետի ընդունած որոշման վրա, որով ճանաչվում էր Թամարա Դոմազյանի սեփականության իրավունքը։
Կարդացեք նաև
Սակայն 2006 թ. հունիսին քաղաքապետն ընդունել է մեկ այլ որոշում, որով չեղյալ է համարել Թամարա Դոմազյանի սեփականության իրավունքը։ Մեկ ամիս անց քաղաքապետը հայց է ներկայացրել դատարան՝ անվավեր ճանաչելու դիմումատուի սեփականության վկայականը, որը բավարարվել է: Վերջինս լիազորել է իր փաստաբանին՝ ներկայացնելու քաղաքապետի 2006 թ. հունիսի որոշումն անվավեր համարելու հակընդդեմ հայց:
2006թ. նոյեմբերի 1-ին առաջին ատյանի դատարանի որոշմամբ չի ընդունվել Թամարա Դոմազյանի լիազոր ներկայացուցչի ներկայացրած հակընդդեմ հայցը: Այնուհետեւ քաղաքապետի ներկայացրած հայցի բավարարման դեմ փաստաբանը գանգատ է ներկայացրել Վերաքննիչ դատարան, որն այն թողել է առանց քննության՝ նշելով, որ ընդհանուր իրավասության առաջին ատյանի դատարանի բողոքարկումը չի կատարվել պատշաճ ժամկետներում։
Թամարա Դոմազյանի ներկայացուցչի բողոքը մերժվել է նաեւ Վճռաբեկ դատարանի կողմից 2007 թ. փետրվարին։
Լուսինե ԲՈՒԴԱՂՅԱՆ
