Այսօր առավոտյան Ազատության հրապարակում չնայած նրան, որ ոչ ոք չկար, այնուամենայնիվ, մեծ թվով ոստիկաններ ոստիկանական մեքենաներով հրապարակի չորս բոլորը հավաքված էին: Հրապարակ մտնող ամեն մի քաղաքացի հայտնվում էր նրանց ուշադրության կենտրոնում:
Այլ էր իրավիճակը, ժողովրդի լեզվով ասած, «Մետաքս» թաղամասում:
Դեպի ոստիկանության պարեկապահակային ծառայության (ՊՊԾ) գունդ տանող բոլոր ճանապարհներն արդեն 3-րդ օրն է, փակ են: Թե’ Էրեբունու թաղապետարանի հարակից փողոցից, թե’ Աթոյան, թե’ Տիգրան Մեծ փողոցներից ոստիկանական եւ բեռնատար ավտոմեքենաները պատնեշի դեր են տանում եւ ելումուտն արգելված է: Միայն թույլատրվում է ՊՊԾ գնդի մերձակայքում ապրող բնակիչների անցուդարձը` այն էլ որոշ հատվածներում առանց մեքենաների: Հատկապես տուժածի կարգավիճակում են Սարի թաղի բնակիչները, որոնց ճանապարհը Խորենացի փողոցով է: Այսօր հատկապես մեծահասակները, որոնք իրերով փորձում էին անցնել ու բարձրանալ տուն, մեծ դժգոհությամբ էին հետ դառնում` ոստիկաների արգելքին հանդիպելիս:
Կարդացեք նաև
Aravot.am-ը շրջեց փակ փողոցներով: Աթոյան փողոցում ոստիկանական մեքենաների հետ միասին, նույնպես բեռնատարներով էր փողոցը փակվել, ինչպես Խորենացի փողոցում: Մեր հարցին, թե ո՞ւմ են պատկանում այդ բեռնատարները, ոստիկանները չպատասխանեցին: Այստեղ էլ անծանոթ անցորդներին հարցուփորձ էին անում` ով է, ինչ է, բնակիչներին արդեն ճանաչում էին: Եվ, եթե տեղի բնակիչ չես, ապա արգելում էին խաչմերուկից առաջ շարժվել` պատճառաբանելով, որ արգելված է առաջ գնալ:
Խորենացի փողոցում բեռնատարները, ոստիկանների նման հերթափոխով էին կանգնում, որոշ ժամանակ անց բեռնատարին մեկ այլ բեռնատար էր գալիս փոխարինելու: Եթե տարածքի բնակչությունը դժգոհ էր ստեղծված իրավիճակից, ապա Խորենացի փողոցում ՊՊԾ գնդի հարեւանությամբ գործող սուպերմարքեթները գոհ էին, առեւտուրն այս օրերին ավելացել է: Ինչպես մեզ հետ զրույցում ասացին խանութի աշխատակիցները, հիմնականում վաճառում են ջրեղեն, սուրճ, հյութեր, արեւածաղիկ ու քաղցրեղեն:
Խանութներից քիչ այն կողմ ծառերի հովին հավաքվում են «Հիմնադիր խորհրդարանի» անդամները, համակիրները: Նրանցից ոմանք ոստիկանության բաժանմունքներ բերման ենթարկված եւ ազատ արձակված քաղաքացիներ էին:
Լուսինե ԲՈՒԴԱՂՅԱՆ
