«Ուժեղ Հայաստան» կուսակցության առաջնորդ Սամվել Կարապետյանի գործով դատական նիստում այսօր հարցաքննվեց գործով վկա Հակոբ Վարդանյանը։
Հակակոռուպցիոն դատարանում՝ դատավոր Վահե Դոլմազյանի նախագահությամբ ընթացող նիստում Հակոբ Վարդանյանը հայտնեց, որ «Նեքսիա Armenia»-ում է աշխատել որպես հաշվապահ, հետո զբաղեցրել է ավագ մենեջերի պաշտոնը։ Նրա խոսքով, ինքն է կատարել նաև «Սոլար Պարկի» հաշվառումը:
Վկայի խոսքով՝ հաշվառումն իրականացրել են՝ «ամբողջությամբ օրենքի տառին համապատասխան: Դրա շրջանակներում անցել ենք հարկային ստուգումներ, ամեն ինչ ճիշտ ենք արել»։
Կարդացեք նաև
Նրա խոսքով՝ Նաիրի Ադամյանը նախկինում եղել է ՀԷՑ-ի հաշվապահը, իսկ իրենց ընկերությունում՝ փոխտնօրեն՝ ըստ հաստիքացուցակի։
Հարցին, թե ով է հանձնարարել իրեն վարել «Սոլար Պարկ» ընկերության հաշվապահությունը, Վարդանյանը պատասխանեց, որ նման աշխատանքը ղեկավարությունն է բաշխում։
«Սոլար Պարկ» և ՀԷՑ ընկերությունների աշխատակիցների ու հաստիքացուցակների փոխկապակցվածության վերաբերյալ վկան ասաց, որ տեղեկություն չունի։
Հարցին, թե ճանաչո՞ւմ է Կարեն Հարությունյանին, Հայկ Դարբինյանին և Սերգեյ Հարությունյանին, Վարդանյանը պատասխանեց, որ վերջիններս «Սոլար Պարկի» հիմնադիրներն են, իսկ ՀԷՑ-ի հետ նրանց հնարավոր կապի, առնչության վերաբերյալ վկան ասաց՝ տեղեկություն չունի։
Դատախազը հարցրեց նաև տուրբոգեներատորային կայանների գործարքների վերաբերյալ նախաքննության ընթացքում ստացված տեղեկությունների մասին։ Վարդանյանը պատասխանեց, որ կայանների ձեռքբերման վերաբերյալ եղել է պայմանագիր և հարկային հաշիվներ, իրականացվել են համապատասխան ձևակերպումներ, որոնք հետագայում ստուգվել են։ Նրա խոսքով՝ ամեն ինչ պատշաճ կերպով ձևակերպվել է։
Հարցին, թե ստուգե՞լ է՝ ինչ գույք է ձեռք բերվում, վկան պատասխանեց, որ ստացել են փաստաթղթերի ամբողջական փաթեթը և դրա հիման վրա կատարել ձևակերպումները։ Նրա խոսքով՝ փաթեթն ամբողջական էր և պատշաճ տեսքի, և ինքն էլ այն ձևակերպել է։
Հարցին, թե կայանները ձեռք են բերվել վարկայի՞ն միջոցներով, Վարդանյանը պատասխանեց, որ տեղյակ չէ, սակայն վստահեցրեց, որ իր ունեցած տեղեկատվության շրջանակում ամեն ինչ նորմալ է եղել, ռիսկ չի տեսել, և այդ հիմքով էլ կատարել է համապատասխան ձևակերպումները։
Գործարքներից հետո կայանների հետագա ճակատագրի վերաբերյալ վկան ասաց, որ դրանք երկար ժամանակ պահպանվել են, այնուհետև ստացել է փաստաթղթերի փաթեթ, համաձայն որի՝ կայաններն արտահանվել են երկրից։
Հարցին, թե երբ «Սոլար Պարկ»-ը ձեռք էր բերել կայանները, արդյոք ընկերությունը վճարում կատարել էր, Վարդանյանը պատասխանել է, որ մասնակի վճարում կատարվել է «Էներգո գրուպին», ումից գնվել էր, սակայն գործարքի մանրամասները չի հիշում, այդ թվում ձեռքբերման նպատակը:
Արփինե ՍԻՄՈՆՅԱՆ
