Քիչ առաջ ՀՀ Վերաքննիչ դատարանում ավարտվեց «Սասնա ծռեր» խմբի անդամ, 29–ամյա Հովհաննես Հարությունյանի կալանքի որոշման դեմ բողոքի քննությունը: Դատարանի որոշումը կհրապարակվի վաղն առավոտյան: Հովհաննես Հարությունյանի պաշտպան՝ փաստաբան Հայարփի Սարգսյանը Aravot.am-ի հետ զրույցում ասաց, որ դատաքննությանը ներկա Հովհաննեսն իր ծանր առողջական վիճակով հուզել էր դատավարական բոլոր կողմերին:
Փաստաբանի խոսքով, Հովհաննեսը դատարան էր բերվել պատգարակով, նա ցավերի մեջ էր. «Բոլոր ներկաները հուզվել էի նրա անօգնական վիճակից ու այն ամենից, ինչ նկարագրվեց պաշտպանական կողմից: Հովհաննեսը չի կարողանում տեղաշարժվել, իսկ պահման վայրում՝ «Դատապարտյալների հիվանդանոցում» չկան սանիտարահիգիենիկ պայմաններ, մշտական բուժհսկողություն եւ այլ խնդիրներ կան»:
Հետաքրքրվեցինք՝ իսկ ինչով կբացատրի Արցախի հերոս Վիտալի Բալասանյանի պնդումները, թե այցելել է «Դատապարտյալների հիվանդանոց» եւ լավ պայմաններ է արձանագրել:
Հիշեցնենք, որ պարոն Բալասանյանն ասել էր. «Ովքեր նման հայտարարություններ են անում, ես պատրաստ եմ օրվա ցանկացած ժամի, իրավապահների թույլտվությամբ իրենց հետ այցելել, ընդհուպ «Դատապարտյալների հիվանդանոց», այցելել կալանավայրեր, եւ թող ինձ ապացուցեն: Ես երեկ անձամբ եղել եմ «Դատապարտյալների հիվանդանոցում», հանդիպել եմ բոլոր վիրավորներին, կարող եմ ասել, կան հիվանդասենյակներ, որտեղ Արամ եւ Պավել Մանուկյաններն են, հանրապետության որեւէ հիվանդանոցում այդպիսի լավ վիճակի հիվանդասենյակ չկա»:
Կարդացեք նաև
Փաստաբանն ի պատասխան ասաց. «Երեւի չեն ցանկանում ներկայացնել այն, ինչ իրականում կա: Ինքս այցելում եմ եւ տեսնում, կոնկրետ իմ պաշտպանյալին վերակենդանացման բաժանմունքից տեղափոխել էին մի քարանձավ, հետո հիվանդասենյակ, միայն պատերն են փոխվել. նույն միջատներն են, նույն անուշադրությունը»:
Փաստաբանին այդօրվա դատաքննությունը հույս է ներշնչել, որ դատարանը կբավարարի բողոքը:
Արփինե ՍԻՄՈՆՅԱՆ
Ընդամենը կնշեմ,որ ասյ երիտասարդ փաստաբանը կամ ստախոս է,կամ ինչ որ բան շփոթում է… երևի թե միկռաֆոնների պատճառով։Երևում է,որ աղջնակը արագ առաջ գնալու ուղիներ է փնտրում… չհասկանալով այն պարզ ճշմարտությունը,որ սուտ խոսելով երկար ճանապարհ չեն անցնում։Իր դեղնակտուց հալին Արցախի հերոս գենեռալի խոսքերը կասկածի տակ է դնում։Ինչքան էլ պաշպանում ես էտ թեկուզ լավ տղային/կապ չունի ում/,էլի մեկէ սուտ խոսել չի կարելի։