«Դա քաղաքական որոշում է. որեւէ դատավոր այսօր չի գտնվի, որ կարող է օրենքով ղեկավարվել եւ անկախ որոշում կայացնել»,- օգոստոսի 22-ին «Մեդիա կենտրոնում», անդրադառնալով Երեւանի ավագանու անդամ Դավիթ Սանասարյանի խափանման միջոց 2-ամսյա կալանքը գրավով փոխելու հանգամանքին, ասաց փաստաբան Արա Ղարագյոզյանը:
Նա ընդգծեց, որ քրեական գործը չի կարճվել, իրականացվում է նախաքննություն. «Մեր հաջորդ քայլը քրեական հետապնդումը դադարեցնելու միջնորդությունն է լինելու, որովհետեւ այս փուլում մենք մինչեւ օրս մեր պաշտպանյալի գործողությունների մեջ որեւէ հանցակազմ չենք տեսնում: Երբ որ կալանքի հարցն էր քննարկվում՝ միջնորդությանը կից ներկայացվել են ոստիկանության մի քանի ցուցմունքներ, որեւէ այլ ապացույց չկա: Կան տեսանյութեր, որտեղ Դավիթ Սանասարյանը բռնություն կամ այլ գործողություններ չի հրահրում»:
Արա Ղարագյոզյանը նշեց, որ պաշտպանական կողմը համարում է, որ Դավիթ Սանասարյանի նկատմամբ որպես խափանման միջոց նշանակված կալանքն ապօրինի է, եւ պատրաստվում են այն բողոքարկել Վճռաբեկ դատարան, եւ եթե մերժում ստանան՝ նաեւ Մարդու իրավունքների եվրոպական դատարան:
Ամի ՉԻՉԱԿՅԱՆ
