Քաղաքագետ Սերգեյ Մինասյանի համոզմամբ, ռազմական նոր սրման հավանականությունն այսօր ավելի մեծ է, քան բանակցությունների զարգացումը:
«Չեմ կարծում, որ նույնիսկ ցանկության դեպքում հնարավոր են միակողմանի զիջումներ տարածքների շուրջ… Ապրիլյան իրադարձություններից հետո ակնհայտ է, որ եթե ինչ-որ բանակցային գործընթաց էլ տեղի է ունենում, ապա Մինսկի խումբը, ՌԴ-ն փորձում են լուծել անլուծելի խնդիրը՝ փորձելով համադրել հայկական կողմի պահանջները շփման գծում վստահության մեխանիզմների ստեղծման առումով ու մյուս կողմից Ադրբեջանին համոզել, որ դա չի նշանակում ստատուս քվոյի լիակատար սառեցում, եւ այդ ջանքերը կբերեն բանակցային գործընթացի ակտիվացմանը»,- այսօր «Փաստարկ» ակումբում ասաց քաղաքագետը:
Ըստ նրա, հենց այստեղ է թաքնված ծուղակը. «Այո, Ադրբեջանը պահանջում էր՝ բանակցային գործընթացն ակտիվանա, բայց բանակցային գործընթացի արդյունք տեսնում էր առաջարկներից միայն մի մասը, որը վերաբերում է տարածքների ու փախստականների հարցին: Իսկ ԼՂ կարգավիճակին վերաբերող հարցից Ադրբեջանը փորձում էր խուսափել»:
Պարոն Մինասյանի խոսքով, ապրիլյան դեպքերից հետո Ադրբեջանում կային պատրանքներ՝ հնարավոր է բանակցային գործընթացում ստեղծել մի իրավիճակ, երբ կողմերը կարող են գալ համաձայնության՝ շրջանցելով կարգավիճակը, ինչը չիրականացավ. «Այս պահին շատ մոտ ենք բանակցային գործընթացի փակուղուն, այստեղ նույն ձեւով, ինչպես ապրիլյան իրադարձություններից հետո՝ ադրբեջանական կողմը կանգնում է երկընտրանքի առջեւ՝ մերվե՞լ այս իրավիճակի հետ, երբ բանակցությունները փակուղում են ու ստատուս քվոյի հեռանկար է ստեղծվում, թե՞ իրավիճակը չի բխում իրենց շահերից ու պետք է փորձել գնալ նոր ավանտյուրայի: Դրանից բխող մնացած հետեւությունները կախված են, թե ինչ ընտրություն կանի Ադրբեջանը»:
Կարդացեք նաև
Արփինե ՍԻՄՈՆՅԱՆ
