Նախորդ տարվա նոյեմբերի 25-ին Նորք-Մարաշում վնասազերծված հանցավոր խմբի գործից անջատված մասով այսօր Կենտրոն եւ Նորք Մարաշ վարչական շրջանների ընդհանուր իրավասության դատարանը հրապարակեց դատավճիռը:
Ստեփան Չիլինգարյանը դատապարտվեց մեկ տարի վեց ամիս ազատազրկման, նույնքան էլ պատժաչափը նշանակվեց Հարություն Հովհաննիսյանին:
Իսկ Հակոբ Հակոբյանն ու Անուշավան Ավետիսյանը, ըստ դատավճռի, կազատազրկվեն երեք տարի վեց ամսով:
Հիշեցնենք, որ Չիլինգարյանն ու Հարությունյանը մեղադրվում էին քրեական օրենսգրքի 235 հոդվածի առաջին մասով, իսկ Հակոբյանն ու Ավետիսյանը քրեական օրենսգրքի 235 հոդվածի երկրորդ մասով:
Կարդացեք նաև
Հիշեցնենք, որ համաձայն մեղադրական եզրակացության՝ Հակոբ Հակոբյանը 2015թ. հուլիսին, հանցախմբի ղեկավար Արթուր Վարդանյանից առաջարկություն է ստացել համապատասխան վարձատրության դիմաց զենք, ռազմամթերք եւ պայթուցիկ նյութեր հայթայթել եւ իրեն վաճառել: Հակոբ Հակոբյանը չի իմացել, որ այդ զենքերը նախատեսվում էին, ըստ անհրաժեշտության, գործածել Հայաստանում իշխանությունը զավթելու ժամանակ: Նա նույն հարցով դիմել է ծանոթին` Գյումրի քաղաքի բնակիչ Անուշավան Ավետիսյանին, որից հետո երկուսով, նախնական համաձայնությամբ, ձեռնամուխ են եղել այդ գործընթացին:
Մյուս մեղադրյալ Հարություն Հովհաննիսյանն էլ, նույն առաջարկությունը ստանալով Անուշավան Ավետիսյանից, 2015թ. հուլիսին Գյումրիում 900 ԱՄՆ դոլարով զենք-զինամթերք է իրացրել:
Ըստ մեղադրանքի՝ Ստեփան Չիլինգարյանն էլ, իր հերթին, Անուշավան Ավետիսյանից նույն ամսին առաջարկություն է ստացել համապատասխան վարձատրության դիմաց զենք, զինամթերք եւ պայթուցիկ նյութեր հայթայթել եւ իրացնել: Նա էլ չի իմացել, որ դրանք նախատեսվում են ըստ անհրաժեշտության գործածել՝ Հայաստանում իշխանությունը զավթելու ժամանակ: Ստեփան Չիլինգարյանը 4700 ԱՄՆ դոլարով զենք-զինամթերք է իրացրել:
Հիշյալ անձանց մեղադրանք է առաջադրվել` ՀՀ ՔՕ 235-րդ հոդվածի (ապօրինի զենք-զինամթերք պահել, իրացնելը…) հատկանիշներով:
Արփինե ՍԻՄՈՆՅԱՆ
