«Այսօրվա իշխանությունն ապրում է վախերի մեջ: Խոսում է փոփոխությունների մասին, թե ինչ է եղել, մի օր էլ մենք էլ ենք լինելու ընդդիմություն, բայց ցանկացած փոփոխությունից՝ նորի գալու, վախենում են»,- այսօր «Հայելի» ակումբում խոսելով Վանաձորում ՏԻՄ ընտրությունների մասին՝ ասաց «Ժառանգություն» խմբակցության պատգամավոր Թեւան Պողոսյանը:
Նրա խոսքերով՝ «Եթե ունես մի թուղթ, որտեղ 18 հոգի ստորագրել են, եթե այդքան վստահ էիք, որ նորին ընդունում եք, ինչի՞ էիք վախեցել, որ բաց քվեարկեն: ԱԺ-ում էլ փակ քվեարկությունների ժամանակ մարդիկ երբեմն բաց քվեարկում են»:
Ի պատասխան՝ ՀՀԿ խմբակցության պատգամավոր Լեւոն Մարտիրոսյանը Վանաձորում քվեարկության արդյունքները համեմատեց մաֆիա խաղի հետ. «Բազմաթիվ մարդիկ կան, որ մաֆիա խաղը խաղացել են: Խաղը, որ սկսում է, ասում են՝ դե, բնականաբար, ես կարմիր եմ: Հիմա մարդիկ հուշագիր են ստորագրել, ասում են կարմիր ենք, բայց պարզվել է, որ այդ 3 հոգին «սեւ» են դուրս եկել: Հիմա այդ մարդկանց խնդիրն է, որ իրենք այդ խաղը պարտվել են, մյուս մասը ի՞նչ կապ ունի: Սա ուղղակի լավ դաս է: Հուշագիր ստորագրել են 3 կուսակցություններ, ՀՀԿ-ն ի՞նչ կապ ունի»:
Մենք ճշտեցինք, եթե 3 հոգին «սեւ են դուրս եկել», փաստորեն մաֆիան ՀՀԿ-ն է՝ Լեւոն Մարտիրոսյանը արձագանքեց. «Ընդդիմությունից են հերթով ասուլիս տալիս ու ասում՝ դե պարզ է, որ մենք կարմիր ենք: Թե էդ ո՞նց է պարզ, 4 հոգին չի՞, որ ուրիշ ձեւ են քվեարկել»:
Կարդացեք նաև
Թեւան Պողոսյանն էլ արձանագրեց. «Այսօրվա իշխանությունները ամեն ինչ գիտեն՝ գիտեն սեւին, կարմիրին, որովհետեւ կարմիրին չեն կարողացել ճնշել: Փաստն այն է, որ 14 հոգի կարմիր են: Բայց ինձ մի հարց է զարմացնում՝ այդքան իշխանություն ունենալով՝ պատկերացնում եք, դե 34 տոկոսը մեկ է մենք ենք հաղթել, այդ ի՞նչ էր լինելու, որ այդքան միջոց տրամադրեցիք: Դրանից հետո տանկեր, սամալյոտ…»:
Լեւոն Մարտիրոսյանն էլ ծիծաղեց. «Մարդիկ որ սեփական հուշագիրը չեն հարգում, ո՞վ է մեղավոր: Ոչ մի վախենալու բան չունենք: Փաստն այն է, որ մարդիկ 18 հոգով նստել են մի բան են ստորագրել, այ մարդ, մյուս ճամբարը ի՞նչ կապ ունի: Հարգեք ձեր ստորագրածը: Տվյալ մարդը ընտրվել է քաղաքապետ՝ օրինական ճանապարհով: Ես, օրինակ, իրենց տեղը լինեի, այդ հուշագրից դուրս կգայի ամոթից»:
Թեւան Պողոսյանը համոզված է, որ ինչ-որ գործարք է եղել ու ուշ թե շուտ հուշագիրը դավաճանողները բացահայտվելու են:
Հռիփսիմե ՋԵԲԵՋՅԱՆ
