Վաղը Ազգային ժողովում կքննարկվի Կարեն Կարապետյանի կառավարության ծրագիրը, որի ՍՓՅՈՒՌՔ բաժնում գրված է. Հայաստանի Հանրապետության կառավարության օժանդակությամբ «Մեկ պատուհանի սկզբունքով» գործող կառույցի ստեղծում՝ սփյուռքահայերին խորհրդատվական ծառայություններ տրամադրելու, բիզնես ծրագրեր առաջարկելու, ներդրումների սահուն իրականացմանն օգնելու համար:
Լավ է, բայց նոր կառույցը ենթադրում է նոր ծախսեր, մինչդեռ նույն ծրագրի ՊԵՏԱԿԱՆ ՀԱՄԱԿԱՐԳԻ ԲԱՐԵՓՈԽՈՒՄ բաժնում գրված է. պետական կառավարման մարմինների կողմից քաղաքացիներին և տնտեսավարող սուբյեկտներին կոռուպցիայից զերծ ծառայությունների մատուցման նպատակով ավելորդ ընթացակարգերի և օղակների վերհանում ու վերացում, պետական կառավարման ապարատի ծախսերի կրճատում՝ հիմք ընդունելով իրականացվող գործառույթների անհրաժեշտությունն ու փաստացի իրականացումը եւ այլն:
Նախքան Կարեն Կարապետյանը Հայաստանում ստեղծվել են բազմաթիվ կառույցներ, որ կարող են սփյուռքահայերին օգնել. «Հայաստան» համահայկական հիմնադրամ, սփյուռքի նախարարություն, ստեղծված բայց չգործող համահայկական բանկ եւ այլն: Նոր կառույց ստեղծելու կարիք չկա, պետք է ստեղծվածները օպտիմալացնել եւ գործի գցել: Եթե մեքենան լավ չի աշխատում, դեռ չի նշանակում, որ այն վատն է, գուցե վարորդն է անտեղյակ-ապաշնորհի մեկը: Դատելով մեր պետության վերջին 20 տարվա կյանքից, մեր դեպքում հենց վարորդներն են վատը` մեքենան լավն է: Կարեն Կարապետյանը պիտի վարորդ փոխի, ոչ թե նոր մեքենա գնի:
Նելլի ԳՐԻԳՈՐՅԱՆ
