«Պարզ չի՝ սեփականատեր փոխվո՞ւմ է, թե ոչ: Որքան հասկացա՝ ողջ գումարը գնալու է բյուջե, հետո գնա համապատասխան բաներին, բայց այս հարցը «Ազատ դեմոկրատները» մեկ տարի առաջ բարձրացրել են ԱԺ-ում: Եթե մեր նախագահն ու վարչապետը կարող էին այդ հարցը միանգամից լուծել, թող մեկ տարի առաջ լուծեին»,- «Հայելի» մամուլի ակումբում այսօր անդրադառնալով «Սեքյուրիթի դրիմ», «Փարքինգ Սիթի Սերվիս» և «Լոկատոր» ընկերությունների գործառույթները պետությանը փոխանցելու վերաբերյալ Կարեն Կարապետյանի հանձնարարականին, ասաց «Ազատ դեմոկրատներ» կուսակցության վարչության անդամ Արմեն Առաքելյանը:
Հիշեցնենք, որ վարչապետը հանձնարարել էր նշյալ ընկերությունների ֆինանսական հոսքերի ամբողջական տնօրինումը փոխանցել պետությանը:
«Բյուջեն հաշվետու է, բոլորը կարող են վերահսկել: Քերելով հավաքում են ժողովրդի ձեռքից այդ գումարները: Տաքսիստները երեխայի հացից կտրում տուգանք են մուծում ու չգիտես՝ ո՞ւր է գնում»,- դժգոհեց Արմեն Առաքելյանը: Ըստ նրա՝ ՃՈ-ն այդ գումարները տնօրինելով՝ ոչինչ չի ձեռնարկել, օրինակ, խցանումները վերացնելու համար. «Մտածում են՝ որտեղ ինչ տեսախցիկ դնեն, որ այդ գումարները կորզեն»:
Կարդացեք նաև
Ասուլիսի մեկ այլ բանախոս՝ ԱԺ ՀՀԿ խմբակցության պատգամավոր Արտակ Դավթյանն էլ համաձայն չէ պնդման հետ, թե Ճանապարհային ոստիկանությունը ոչինչ չի արել. «Հետիոտների նկատմամբ վերաբերմունքն, օրինակ, փոխվել է: Սա չի նշանակում, որ մենք բավարարված ենք: Իմ մաշկի վրա զգում եմ որպես վարորդ: Խոսակցություններ եղան, թե պատգամավորները չեն տուգանվում, բայց տուգանվում ենք՝ այն էլ ինչպես»:
Դավթյանը վստահ է, որ նշյալ հանձնարարականով կապահովվի գումարների թափանցիկությունը:
Լուիզա ՍՈՒՔԻԱՍՅԱՆ
