Այսօր ԱԺ-ում Ալեքսան Պետրոսյանը՝ ՄԱՊ-ի Ալիկը, իր ձեւակերպմամբ՝ հասարակության կողմից բարձրացված հարց ուղղեց փոխոստիկանապետ Վարդան Եղիազարյանին. «Շատ-շատ քաղաքացիներ բողոքում են, որ մարդասպանությունները, դժբախտ դեպքերը, վթարների հետ կապված, որ մարդիկ են մահանում, անընդհատ հեռուստատեսությունով ցույց են տալիս տարբեր ալիքներով ու մի քանի անգամ: Երեխաներ են նայում, վախենում են, կարելի՞ է անընդհատ բացասական նյութերով…Հա, հիմա ավարիա է եղել, դժբախտ դեպք է պատահել, մարդը մահացել է, պարտադի՞ր է, որ մի շաբաթ անընդհատ հեռուստատեսությունով մարդուն մեռած ցույց տան, արյունոտ ցույց տան, տհաճ է, երեխաներ են նայում»:
Նա բողոքեց, որ գունավոր էլ ցույց են տալիս. «Մարդիկ ասում են՝ խնդրեք ոստիկանությանը, որ քիչ ցույց տան, էլի, տպավորություն է, որ ամեն օր այդքան մարդ է մահանում»:
Նա հարյուրավոր մարդկանց անունից խնդրեց. «Մի քիչ քչացրեք, էլի, մի քիչ պարկեշտ ձեւով ցույց տան, կամ ընդհանրապես ցույց չտան: Կինոյի նման ցույց են տալիս, կինո են նկարում՝ ամեն երեւույթի հետ կապված»:
Փոխոստիկանապետն էլ պատասխանեց, որ ԶԼՄ-ներում այդպիսի տեսարաններ տարածելու առումով ոստիկանության տարածածը շատ քիչ է: Ըստ նրա, լրագրողներն են դա չարաշահում, իսկ 02-ը եւ ոստիկանությունը բավականին զուսպ են:
Կարդացեք նաև
Ալեքսան Պետրոսյանն էլ հորդորեց արգելել, թույլ չտալ, որ հեռուստատեսությամբ նման տեսարաններ ցուցադրեն. «Հեռուստատեսությանը ասեք՝ գիտես ինչ, դու իմ մասով ես ցույց տալի՞ս, մի ցույց տուր, կամ՝ այ այսքան ցույց տուր»:
Փոխոստիկանապետը հիշեցրեց, որ իրենք նման լիազորություններ չունեն, ավելի շատ պատգամավորները կարող են դա անել:
Հռիփսիմե ՋԵԲԵՋՅԱՆ
