Այսօր Գյումրու Վարդան Աճեմյանի անվան դրամատիկական թատրոնում առաջին անգամ ցուցադրվեց արդեն իսկ մեծ էկրանին հայտնված «Երկրաշարժ» ֆիլմը։ Ֆիլմի այսօրվա հանդիսատեսը մեծամասամբ երկրաշարժ տեսած մարդիկ էին, որոնք անընդմեջ հուզվում էին, սրբում արցունքները՝ վերհիշելով 1988 թվականի դեկտեմբերի 7-ին իրենց ապրած դաժան օրերը, փլատակների ու սգի վերածված քաղաքը։
Հանդիսատեսներից տարեց մի կին նույնիսկ նեղվեց, թե հազիվ էինք մի պահ մոռացել, պե՞տք էր սա մեզ տեսնելը։ Ֆիլմի ավարտից հետո շատերը, հատկապես տղամարդիկ լուռ ու մտախոհ հեռանում էին, կանայք՝ ընդհակառակը, երկրաշարժի մասին իրենց ցավոտ հիշողություններն էին բարձր-բարձր պատմում, քննարկում ֆիլմում տեղ գտած դրվագները։
Նշենք, որ երկու ամիս առաջ Գյումրում եղել է ֆիլմի փակ դիտում, ու տարբեր կարծիքներ են հնչել․․․Այսօր թատրոնի դահլիճում ոչ մի ազատ տեղ չկար, այն դիտում էին անգամ կանգնած ու հատակին նստած։ Ֆիլմը դիտելու էր եկել նաև Գյումրու քաղաքապետ Սամվել Բալասանյանը ԱԺ պատգամավոր Մարտուն Գրիգորյանի ու փոխքաղաքապետ Վաղարշակ Մխիթարյանի հետ։
Կարդացեք նաև
Ֆիլմի ստեղծագործական անձնակազմից Գյումրի էր եկել կոմպոզիտորը՝ ՀՀ վաստակավոր արտիստ Հայկ Հակոբյանը՝ Հայկոն։ Հիշեցնենք, որ ֆիլմի ռեժիսորը՝ Սարիկ Անդրեասյան է,օպերատորը՝ Յուրի Կորոբեյնիկովը։ Հայկոն ասաց, որ տարբեր քաղաքներում ֆիլմը ներկայացնում են ստեղծագործական խմբից տարբեր մարդիկ, և մեծ պատիվ համարեց, որ գյումրեցիներին ներկայացնելու է ինքը։
«Ֆիմը շատ հուզիչ է, կուզենայի, որ գյումրեցիներին դուր գար, նաև հայերիս համար կարևոր է ֆիլմի մեծ էկրանը դուրս գալը, ամբողջ աշխարհը սկսել է խոսել Հայաստանի մասին, սկսել է խոսել Գյումրիի մասին։ Ասեմ, որ ֆիլմն ինքն իրենով ֆիլմ-շնորհակալություն է ամբողջ աշխարհին, այն բոլոր երկրներին, որոնք դժվարին օրերին եղել եմ մեր հայերիս կողքին»,- ասաց ֆիլմի կոմպոզիտորը։
Նշենք, որ ֆիլմում միայնակ չլինելու գաղափարը շեշտված էր մի քանի դրվագներով, երբ հերոսներից տարեց տղամարդը երկրաշարժի 4-րդ օրը փլատակների տակից ողջ գտավ իր կնոջը, ու կինը հարցրեց՝ հիմա ինչպե՞ս ապրենք՝ այսպես ցավով, երկրաշարժից փրկված տղամարդը, վերարժեվորելով իր կյանքը, ասաց․«Կապրենք,ինչպես ապրել ենք, մենակությունն է ցավ, իսկ մենք երկուսով ենք»։
Վաղը ֆիլմը կցուցադրվի Վանաձորում՝ քաղաքապետ Մամիկոն Ասլանյանի հրավերով։
Նունե ԱՐԵՎՇԱՏՅԱՆ
Ոչ վատ ֆիլմ էր, ոչ վատ: Միջին էր: