Դաշինքով ընտրությունների գնալու հարց ՀՅԴ-ի օրակարգում չկա: Այսօր «Հայելի» ակումբում այդ մասին հարցին, թե ինչ կարծիք ունեք եռյակի «Ելք» դաշինքի կամ Սեյրան Օհանյանի, Գագիկ Ծառուկյանի շուրջ դաշինքի մասին՝ ՀՅԴ խմբակցության քարտուղար Աղվան Վարդանյանը պատասխանեց. «99 տոկոսով ՀՅԴ-ն գնալու է առանձին: Բայց քաղաքականություն է, երբեք մի ասա երբեք իմաստուն խոսքը կա»:
Նրա խոսքերով՝ մի կողմից քաղաքական գործիչները, ԶԼՄ-ները պարբերաբար ասում են, որ ՀՀ-ում քաղաքական համակարգը կայացած չէ, կուսակցությունները վստահություն չունեն եւ դրա մեջ օբյեկտիվ ճշմարտություն որոշ չափով կա, բայց մյուս կողմից անընդհատ ստեղծվում են նոր կուսակցություններ, ստեղծվում են դաշինքներ. «Այս հակաիրողությունը մի բանի մասին է վկայում: Բոլորը հասկանում են, որ խորհրդարանական կառավարման համակարգում այն քաղաքական ուժերը, որոնք կլինեն հաջորդ ԱԺ-ում, նրանք հնարավորություն կունենան զարգանալու, ընդլայնվելու, աճելու, ովքեր չեն լինի՝ կխոշորանան, կմիավորվեն կամ ընդհանրապես դաշտից դուրս կգան: Սրա համար է այս միավորումը: Այնպես որ, գովելի եւ ողջունելի է ցանկացած միավորում»:
Նա ասաց, որ ՀՅԴ-ի պնդմամբ է եղել, որ նոր Սահմանադրության մեջ ամրագրվել է, որ 30 տոկոսը ԱԺ-ի ներկայացվածության, պետք է լինի ընդդիմությունը: Այն, որ իրենք հիմա իշխանություն են, կապ չունի, գիտակցում են դա:
Սեյրան Օհանյանի հետ կապված նա ասաց, որ պարոն Օհանյանը նոր չի մտնում քաղաքականություն, նա քաղաքական պաշտոն է զբաղեցրել, եղել է թիմի անդամ. «Իր որոշելիքն է իր հետագա քայլերը: Սա քաղաքական խումբ փոխել է թե փոխել չի՝ ինքն է որոշում, ցանկություն ունի եւ իր իրավունքն է: Տեսնենք, ուղղակի ինձ շատ հետաքրքիր է, թե ներքին զարգացումների առումով ինչ ձեւաչափով, ինչ թիմով, ինչ խմբավորումներով, ինչ քաղաքական ուժերով նա կգա ասպարեզ: Սրանից շատ բան ակնհայտ կլինի»:
Կարդացեք նաև
Հարցին՝ հնարավո՞ր է պատկերացնել Սեյրան Օհանյանին ընդդիմություն՝ նա պատասխանեց, որ յուրաքանչյուր մարդ ինքն է որոշելու իր քաղաքական օրակարգը:
Հռիփսիմե ՋԵԲԵՋՅԱՆ
