Սննդաբան Հասմիկ Աբովյանը նկատել է, որ այս տարի Ամանորին նախապատրաստությունը նախկին տարիների պես «հիստերիկ վիճակները» չի եղել եւ մարդիկ «սովածների ամբոխի պես» չեն հարձակվել խանութների վրա: Նրա մեկնաբանմամբ, շատ սնունդ առնելու սովորույթը գալիս է հնուց, երբ սովի վախից մարդիկ կուտակել ու ամբարել են: Մինչդեռ զարգացած երկրներում Ամանորին մարդիկ նախապատվությունը ավելի շատ տալիս են ուրախություններին ու տոնն անցկացնում են զվարճանալով, այլ ոչ թե, ըստ սննդաբանի՝ «ուտելով ու թունավորվելով»:
Նա կոչ է անում խիզախություն ունենալ եւ Ամանորից մնացած սնունդը դեն նետել, քանի որ մարդու առողջությունն ամենաթանկն է. «Պետք չէ մշակման ենթարկել եւ ուտել, մեր մարմինը աղբաման չէ, ափսոսացեք ձեր առողջությունը»:
Սննդաբանը օրգանիզմի բեռնաթափումն առաջարկում է անել ոչ թե սոված մնալով, այլ ավելի քիչ սնվելով: Մասնավորապես մրգերով, լյարդը մաքրելու համար էլ խորհուրդ է տալիս սուրճ օգտագործել. «Հրաժարվեք ճարպերից, ծանր սննդից, ավելի շատ օգտագործեք կաթնամթերք: Մի քանի օր հրաժարվեք աղից, որպեսզի տոն օրերին օրգանիզմում կուտակված ավելորդ հեղուկը, որը այտուցվածություն է առաջացրել, անհետանա»:
Ըստ Հասմիկ Աբովյանի՝ տոնական օրերին խառը սնվելը վտանգավոր չէ, սակայն ալկոհոլի չարաշահումը, շատ կծուն ու թթուն կարող են ենթաստամոքսային գեղձը վնասել եւ մարդուն մահացու վտանգ հասցնել:
Մանրամասները՝ տեսանյութում
Կարդացեք նաև
Լուսինե ԲՈՒԴԱՂՅԱՆ
