«Եթե հարցը կոնկրետ Հովիկ Աբրահամյանի մասին է, չեմ ուզենա մեկնաբանել, բայց ես ցավ եմ զգում, որ ՀՀ նախագահի այդքան մեծ վստահությունից հետո, մեր երկրում այսքան մեծ, կարեւոր ծրագրերի նախաշեմին, Հովիկ Աբրահամյանը զարգացումների այսպիսի ընթացք ունեցավ»,- խորհրդարանում, լրագրողների հետ զրույցում ասաց ՀՀ ԱԺ փոխխոսնակ Հերմինե Նաղդալյանը`պատասխանելով ՀՀԿ-ի շարքերը լքածներին, մասնավորաբար, նախկին վարչապետ Հովիկ Աբրահամյանի կուսակցությունից դուրս գալու մասին հարցին: «Ես համոզված եմ, որ կուսակցական եւ գաղափարական անհավատարմության մեջ ավելի քիչ տրամաբանություն եւ ճշմարտություն կա, քան անգամ ամենավիրավորական եւ կորուստներով լի հավատարմության մեջ»,- հավելեց Հերմինե Նաղդալյանը:
Նա այն կարծիքին չէ, որ այսպիսով ՀՀԿ-ն թուլանում է կամ կորցնում է իր ազդեցությունը: Ինքն անգամ ՀՀԿ-ից հեռացածներին «աբիժնիկ ու դավաճան» չի համարում, ինչպես սիրում են պիտակավորել. «Ես գտնում եմ, որ նրանք մարդիկ են, ովքեր եղել են կուսացություն ժամանակավոր ուղեկիցները՝ պայմանավորված անձնական շահով: Հիմա, երբ մեր ղեկավարի եւ կուսակցություն ղեկավարի կողմից զարկ է տրված քաղաքական անհատական բարեփոխումներին, բնականաբար, յուրաքանչյուր կուսակցական պետք է հանդես գա գաղափարական, քաղաքական իր ողջ կարողությամբ եւ նվիրվածությումբ: Այս պարագայում կային մարդիկ, ովքեր անհանգստացան իրենց մակարդակի, հեղինակության աստիճանի, իրենց էության կամ իրենց տեղի համար, որը զբաղեցրել էին ոչ համաչափ: Այս պարագայում, ավելի կարեւոր է հավատարիմ կուսակցականների դերակատարությանը: Խորապես վստահ եմ, որ կորցնելով այս ժամանակահատվաածում մեր նախկին կուսակից ընկերներին, մենք չենք թուլանում, մենք չենք կորցնում, հակառակը՝ մենք շահում ենք»:
Նելլի ԳՐԻԳՈՐՅԱՆ
Կարդացեք նաև
