Երեկ Շիրակի մարզի Ախուրիկ համայնքում տեղի ունեցան ՏԻՄ ընտրություններ, որին մասնակցում էր գործող գյուղապետ Վարդիթեր Գասպարյանն ու անկուսակցական՝ 27-ամյա Հովհաննես Պողոսյանը, որին, ըստ տիկին Գասպարյանի, աջակցում է Գյումրու ՀԱԿ կառույցի ղեկավար Մուրադ Գրիգորյանն՝ իր թիմակիցներով։
Վարդիթեր Գասպարյանը ՀՀԿ-ական է, նա մասնակցելու է ԱԺ ընտրություններին՝ որպես պատգամավորի թեկնածու․ ընդգրկված է Շիրակի մարզի ՀՀԿ վարկանիշային ցուցակում։ Նրան, բնականաբար, ընդգրկել են ցուցակ՝ Հանրապետական կուսակցությանը ձայներ բերելու ակնկալիքով։ Սակայն, տիկինն իր պայքարն արդեն իսկ սկսեց պարտությամբ՝ 15 ձայնով զիջելով իր մրցակցին։
Ի դեպ, նա երեկ Aravot.am-ին դժգոհել էր, որ Հանրապետական կուսակցության կողմից ոչ մի աջակցություն չի ունեցել։ Ստացվում է, որ այս կուսակցությունը ինքն է միայն աջակիցներ փնտրում՝ հանձինս Վարդիթեր Գասպարյանի, որը 2009 թվականից լինելով գյուղապետ՝ չկարողացավ հաղթել ՏԻՄ ընտրություններում։ Հովհաննես Պողոսյանը հավաքել է 277 ձայն, Վարդիթեր Գասպարյանը՝262։
ՏԻՄ ընտրություններում պարտություն կրած կինը ինչպե՞ս է ձայն բերելու ՀՀԿ-ին Ազգային ժողովի ընտրություններում՝ օգտագործելով իր վարկանիշը, ՀՀԿ կառույցի ուղղված մեր այս հարցը անպատասխան մնաց։
Կարդացեք նաև
Նունե ԱՐԵՎՇԱՏՅԱՆ
