Մարտի 16-ին կայացավ ՀՀ վարչապետի «ԼԱՎԱԳՈՒՅՆ ԿԻՆ ԳՈՐԾԱՐԱՐ» 2017 թվականի մրցանակաբաշխության մրցանակների շնորհման հանդիսավոր արարողությունը: Ամենամյա մրցանակաբաշխությունը իրականացվում է ՀՀ վարչապետի բարձր հովանու ներքո` ՀՀ տնտեսական զարգացման և ներդրումների նախարարության աջակցությամբ ՝ ի դեմս «Հայաստանի փոքր եւ միջին ձեռնարկատիրության զարգացման ազգային կենտրոն» հիմնադրամի:
Կանանց ձեռնարկատիրական գործունեության և նախաձեռնողականության խրախուսման, տնտեսության տարբեր ճյուղերում կին գործարարների նվաճումները, ըստ արժանվույն գնահատման և սատարման գործին մշտապես իր աջակցությունն է ցուցաբերել Հայաստանի Հանրապետական կուսակցության կանանց խորհուրդը, որը տարիներ շարունակ առաջ է մղել փոքր և միջին բիզնեսում կանանց ներգրավվածության և առաջխաղացման գաղափարը:
Այսօր արդեն կան բավական թվով գործարար կանայք, բազմաթիվ ոլորտներից, և՛ Երևանում, և՛ մարզերում, ովքեր շատ ակտիվ ներգրավված են բիզնեսի և արտադրության ոլորտներում, և արդեն վեցերորդ տարին անցկացվող մրցանակաբաշխությունը դրա վառ ապացույցն է:
ՀՀ տնտեսական զարգացման բնագավառում կանանց ձեռնարկատիրական գործունեության մեջ աչքի ընկած կին գործարարներին՝ ՀՀԿ կանանց խորհրդի անունից , ՀՀ ԱԺ փոխնախագահ, ՀՀԿ կանանց խորհրդի նախագահ Հերմինե Նաղդալյանը հատուկ մրցանակներ է հանձնել:
Կարդացեք նաև
«Սկսնակ կին գործարար» անվանակարգին արժանացել է Մելանյա Շահինյանը՝ ( Տավուշի մարզ), մեղրի արտադրության մեջ տարիների փորձառության համար, «Լավագույն կին նորարար» անվանակարգում՝ Ամալյա Գրիգորյանը (Սյունիքի մարզ ) ՝ թոնրի և լավաշի արտադրության ոլորտում զգալի ներդրման համար, «Լավագույն կին գործարար» ՝ Լիդա Սարգսյանը («Լիդա» ֆիրմայի տնօրեն) , «Լավագույն երիտասարդ կին գործարար» անվանակարգում ՝ Նարինե Դավթյանը (Վայոց Ձորի մարզ )՝ « Օժանդակ կրթություն . Ծիածան» մանկապատանեկան ուսումնական կենտրոնի տնօրեն, և ուրիշներ:
Շնորհավորելով բոլոր մասնակիցներին՝ ՀՀԿ կանանց խորհրդի նախագահ Հերմինե Նաղդալյանը իր ելույթում նշել է.
«Հայաստանում գործարար կանանց համար այսօր իսկապես տոն է, և արդեն կարող ենք արձանագրել, որ ոչ միայն ունենք բիզնեսում առաջխաղացում ապահոված, իրենց գործունեության մեջ անունը, համբավն ու հեղինակությունը ապահոված գործարար կանայք, այլ նաև ավանդույթներ, լավագույններին ընտրելու ցանկություն՝ նրանց խրախուսելու և մյուսներին օրինակ ծառայեցնելու համար:
Ես շնորհավորում եմ մեր մրցանակակիրներին հենց միայն նրա համար, որ իրենց մեջ ուժ են գտել , որոշում կայացրել, որ այլևս պետք է զբաղվեն այնպիսի գործով, որը կարող է օգտակար լինել թե՛ իրենց ընտանիքի ու գյուղի համար, և թե՛ ողջ երկրի համար: Ու թեև, աերոդինամիկայի օրենքները իրականում գոյություն ունեն , և դրանք ոչ ոք չեն կարող չեղարկել, այնուամենայնիվ, մենք երջանիկ ենք, որովհետև մեր պետության մեջ ունենք այլ օրենքներ, քաղաքականություն, որը վարում է ՀՀ կառավարությունը՝ նպաստելով յուրաքանչյուրին առավել հեշտությամբ իր նախաձեռնությունը, ինտելեկտը, ներուժը իրացնելու»:
ՀՀԿ կանանց խորհրդի ղեկավարը համոզված է, որ կանայք և իրենց բիզնեսը այնտեղ են, որտեղ միտքն է , ինտելեկտը, գիտելիքը, երիտասարդ սերնդի նկատմամբ հոգատարությունը, կրթությունն ու ուսուցումը, մենտորությունը, և իհարկե, կանայք այնտեղ են, որտեղ կա լավ որակ, լավ արտադրություն:
Հերմինե Նաղդալյանը իր խոսքում փաստել է, որ սահմանամերձ գյուղերի մեր կանայք իսկապես սահմանապահներ են՝ հենց միայն նրանով, որ ապրում են գյուղում, շարունակում են գործել, պահել իրենց գյուղն ու իրենց ընտանիքը և դեռ հիմնադրել սեփական բիզնեսը:
Տիկին Նաղդալյանը հատուկ շնորհակալություն է հայտնել կազմակերպիչներին, այդ թվում՝ Ասիական զարգացման բանկին, այն ծրագրերի ֆինանսավորման և վարկավորման համար, որոնք իրագործվել են նախկինում, և հույս հայտնել, որ դրանք կլինեն շարունակական և հետագայում ևս ավելի մեծ ծավալներով իսկապես կհասնեն իրենց նպատակին: Հերմինե Նաղդալյանը կին գործարարներին մաղթել է՝ նոր ուժերով լծվել երկիրը շենացնելու, ավելի անվտանգ, առաջադեմ, հուսալի և պաշտպանված դարձնելու գործին:
