2016 թվականին Լոռիում, Սյունիքում եւ Տավուշում անցկացվեց համայնքների խոշորացմանն ուղղված տեղական ինքնակառավարման մարմինների հանրաքվե: ՀՀ կառավարությունն այս տարի եւս նախատեսում է շարունակել համայնքների խոշորացման պիլոտային ծրագիրը: Խոշորացվող համայնքներ ունեցող մարզերի մեջ մտնում է նաեւ Լոռու մարզը:
«Ընդամենը 10 օրից մենք տարածքային կառավարման նախարարի հետ համատեղ կշրջենք մեր համայնքներում, կփորձենք ժողովրդին ներկայացնել, թե փոփոխություններն իրենցից ինչ են ներկայացնում: Ըստ այդմ` անպայման կգնանք համայնքների խոշորացման»,- Aravot.am-ի հետ զրույցում ասաց Լոռու մարզպետ Արթուր Նալբանդյանը:
Նախատեսվում է համայնքների խոշորացում իրականացնել Տաշիրի, Ստեփանավանի եւ Թումանյանի տարածաշրջաններում: Սակայն դեռեւս հստակ չէ, թե որ համայնքներն են միավորվելու:
Նախորդ տարի եւս Թումանյանի տարածաշրջանում տեղի ունեցավ համայնքների խոշորացում: Որից հետո Թումանյան քաղաքին միացան թվով 7 գյուղական համայնքներ: Մարզի ղեկավարը թեեւ դրական է գնահատում անցած տարվա փորձը, սակայն ասում է, որ տեմպերն իրենց չի գոհացնում. «Հաշվի առնելով օբյեկտիվ ու սուբյեկտիվ մի քանի պատճառներ, այդ տեմպերը մեզ չեն գոհացնում: Ես վստահ եմ, որ յուրաքանչյուր լավ գործի սկիզբ դժվար է լինում: Համայնքների խոշորացման սկիզբն էլ մի փոքր դժվար կլինի, բայց հետո ամեն ինչ կընկնի իր հունի մեջ»:
Այս պահին մարզի համայնքների խոշորացման նախագիծը գտնվում է քննարկման փուլում:
Տաթեւիկ ՂԱԶԱՐՅԱՆ
