Վարդենիս-Մարտակերտ ավտոճանապարհը փակած Գեղարքունիքի մարզի բնակիչներից մի քանիսն այս պահին ճանապարհվել են Երեւան. նրանք պատրաստվում են հանդիպել վարչապետ Կարեն Կարապետյանին:
Այսօր Գեղարքունիքի մարզի սահմանամերձ համայնքների բնակիչները բողոքի ցույց էին անում՝ Վարդենիս-Մարտակերտ ավտոճանապարհը փակելով: Այս պահին, ինչպես բնակիչներից մեկն ասաց Aravot.am-ին, դադարեցրել են ցույցը, սակայն, եթե վարչապետն իրենց չընդունի եւ կառավարությունն իրենց պահանջը չկատարի, ապա վաղը շարունակելու են ցույցը՝ այս անգամ նաեւ գնացքի ճանապարհն են փակելու:
Ցուցարարները դժգոհում են, որ համայնքների խոշորացման կառավարության ծրագիրն իրենց մարզի սահմանամերձ 20 համայնքների համար կործանարար կլինի. նրանք կառավարությունից պահանջում են վերանայել որոշումը:
Ցույցին մասնակցած մարզի բնակիչներից մեկը մեզ հետ զրույցում ասաց՝ իրենք դեմ են, որ համայնքների խոշորացման արդյունքում 20 գյուղեր միավորվեն դառնան 2-3 համայնք՝ իրենց գյուղապետարաններով:
Բնակիչներն ասում են՝ «Մենք չենք ցանկանում մի փաստաթղթի համար կիլոմետրեր կտրել հասնել էդ խոշորացված համայնքապետարանը: Ամեն մի հարցի համար գնալ ես իմ ուր հասնել: Չենք ուզում մեզ միավորեն ուրիշ գյուղերի հետ»:
Նելլի ԲԱԲԱՅԱՆ
