«Բանակցային գործընթացի կարգավիճակը փոխվել է: Ադրբեջանի դիրքորոշումը չի համընկնում որեւէ փաստաթղթի հետ, լինի դա Կազանյան, թե Մադրիդյան: Ադրբեջանն ասում է՝ ԼՂՀ-ում հայություն չպետք է լինի եւ հարցը ուզում է լուծել ռազմական ճանապարհով»,-«Հայացք» մամուլի ակումբում այսօր անդրադառնալով Արցախյան հակամարտության կարգավորման բանակցությունների ներկայիս փուլին, ասաց միջազգայնագետ Հովհաննես Իգիթյանը:
Նրա բնորոշմամբ՝ Ադրբեջանի համար լուծել հակամարտությունը՝ նշանակում է հայերից ազատել ԼՂՀ-ն. «Սա հնարավոր չէ անել ռազմական ճանապարհով: Այդպես կարելի է հարյուր զոհ տալ, երկու գյուղ ավերել, բայց ոչ ավելին»:
Փորձագետը կարծում է, որ առաջիկայում էլ Ադրբեջանն ագրեսիվ գործողությունների կդիմի, իսկ թե ինչ ծավալի՝ դժվար է ասել:
Անդրադառնալով ԵԱՀԿ Մինսկի համանախագահների հետ հանդիպմանը Էդվարդ Նալբանդյանի դիտարկմանը, թե ժամանակն է, որ եռանախագահներն Ադրբեջանին սանձելու համար գործողությունների դիմեն, Հովհաննես Իգիթյանը նկատեց. «Մոնիթորինգի մեխանիզմների ներդրումն Ադրբեջանը մերժեց: Համանախագահների կողմից պետք է լինեն քաղաքական հայտարարություններ: Եթե դրանք էլ չազդեն, չեմ բացառում, որ խաղաղապահ ուժերի միջոցով փորձեն կողմերին բերել զինադադարի»:
Մանրամասն՝ տեսանյութում:
Լուիզա ՍՈՒՔԻԱՍՅԱՆ
