Քաղաքագետ Արմեն Գրիգորյանի դիտարկմամբ, հայկական կողմը կանխարգելել է ապրիլյան պատերազմի կրկնությունը՝ սահմանին տեսախցիկներ տեղադրելով:
«2011 թվականին Կազանի ձախողումից հետո Ադրբեջանը գնաց ռազմական բյուջեի ավելացմանը, 2011-ին 2,3 միլիարդ դոլար էր, հաջորդ տարի այն դարձրեց 2,6 միլիարդ դոլար… ռազմական բյուջեն վերջին տարիներին հասցրել է երեք միլիարդից ավելի: Ադրբեջանը գնում է ավելի շատ լարվածությունը պահելու ճանապարհով ու կշարունակի այդ ճանապարհով լարվածություն պահել: Երբ ադրբեջանական կողմը սկսեց դիվերսիոն գործողություններն ակտիվացնել, մենք պաշտպանական համակարգը որոշակի չափով փոխեցինք, ադրբեջանցիներն իրենց տակտիկան փոխեցին, հարձակումներն այլ ձեւերով իրականացրին, բայց ապրիլյան պատերազմից հետո տեղադրվեցին տեսախցիկներ, որոնք, կարելի է ասել, կանխարգելեցին դիվերսիոն գործընթացը, ադրբեջանական կողմը վերջերս սկսել է հեռվից կրակել»,- այսօր «Բլից ինֆո» ակումբում ասաց քաղաքագետը:
Նրա համոզմամբ, ապրիլյան սցենարը կանխարգելվել է, հակառակորդի կողմից հանկարծակի հարձակման հավանականությունը շատ քիչ է. «Ամբողջ սահմանով տեղակայված տեսախցիկները կարողանում են բացահայտել ադրբեջանական զորքերի տեղաշարժը: Որոշակի չափով մնում է լայնածավալ գործողությունները, բայց երկու կողմերն էլ ռազմական այնքան տեխնիկա ու ռազմամթերք ունեն, որ երկու կողմերն էլ մեծ կորուստներ կկրեն: Ադրբեջանը կշարունակի իր մարտավարությունը փոխելով՝ զոհեր պատճառել, ռազմաճակատի առաջին գծում զոհեր ապահովել ու այդկերպ ճնշել հայկական կողմին»:
Քաղաքագետը նաեւ նկատեց, որ միջազգային հանրության ազդեցությունը ղարաբաղյան կոնֆլիկտի վրա շատ թույլ է. «Ադրբեջանը հստակ պահանջ ունի ու ձեւակերպում է տարածքային ամբողջականության տեսանկյունից»:
Արփինե ՍԻՄՈՆՅԱՆ
