«Դպրոցին պետք է հանգիստ թողնենք, որ դպրոցը զբաղվի կրթության եւ քաղաքացի դաստիարակելու խնդիրներով»,- խորհրդարանում 2016 թվականի բյուջեի կատարողականի քննարկումների ժամանակ ասաց ՀՀ կրթության եւ գիտության նախարար Լեւոն Մկրտչյանը: Նախարարը գտնում է, որ դպրոցներում ներդրված կառավարման խորհուրդները իրենց չեն արդարացրել:
Լեւոն Մկրտչյանը պատասխանում էր ՀՀԿ-ական պատգամավոր Ռուզաննա Մուրադյանի հարցին: Տիկին Մուրադյանը մի քանի հարցեր ուներ: Դրանք վերաբերում էին առարկայական չափորոշիչների ամրագրմանը, ազգային կրթակարգ ունենալու անհրաժեշտությանը: Պատգամավորը հիշեց, որ 2004 թվականին գրվել է կրթակարգ, դրա որոշ դրույթներ հետո տեղ են գտել «Հանրակրթության մասին» ՀՀ օրենքում:
Ռուզաննա Մուրադյանը նաեւ հետաքրքրվեց`ի՞նչ եղավ կրթության զարգացման պետական ծրագիրը, քննարկումներ սկսվեցին, բայց կիսատ մնաց: Նա հարցեր տվեց նաեւ ուսուցչի թափուր տեղի մրցույթի եւ ատեստավորման հետ կապված:
Նախարարն ասաց, որ պետք է մշակվեր ավագ դպրոցի կրթակարգը, որից հետո առարկայական չափորոշիչների անցնենք. «Մենք պետք է հասկանանք կրթության համակարգի տեսլականը, գանք ընդհանուր խնդիրներից, նոր անցնենք առարկայական չափորոշիչների»: Ի դեպ, եվրոպացի երեխան շաբաթական 14-16 առարկա է անցնում, մեզ մոտ 20-22 առարկա:
Մանրամասները`տեսանյութում
Ռուզաննա Մուրադյանը հանդիպում-քննարկումներ է ունեցել դպրոցների տնօրենների հետ: Բազմաթիվ հարցեր ուներ նախարարին`աշակերտ-թվով ֆինանսավորման եւ այլնի մասով. առաջարկեց լսումներ կազմակերպել եւ առանձին, մասնագիտական լսարանում քննարկել դրանք:
Նելլի ԳՐԻԳՈՐՅԱՆ
