ՀՀ ԱԺ արտահերթ նիստի ընթացքում ՀՀ վերահսկիչ պալատի ղեկավար Լևոն Յոլյանը ներկայացրեց 2016-ի տարեկան հաշվետվությունը: Ըստ այդմ՝ իրականացվել է 23 վերահսկողություն: Վերահսկիչ պալատի կողմից 2016 թվականին իրականացված վերահսկողությունների արդյունքում կազմված ընթացիկ հաշվետվություններից 3-ի մասով հարուցվել են քրեական գործեր:
Պարոն Յոլյանը ԱԺ ամբիոնից հավաստիացրեց, որ պալատի արդյունավետության բարձրացման համար նոր սահմանադրությունն օբյեկտիվորեն ավելի լավ հնարավորություններ է ստեղծում:
Պարոն Յոլյանին հարց հղեց «Ծառուկյան» խմբակցության պատգամավոր Իվետա Տոնոյանը: Նա հիշեցրեց, որ բյուջեի կատարողականի վրա մեկ հպանցիկ հայացքը բավարար էր, որ ակնհայտ լիներ՝ թարգմանչական ծառայությունների համար 217.5 միլիոն դրամ համապատասխանաբար ծախսվել է 25.000 էջի թարգմանության համար: Իվետա Տոնոյանի պնդմամբ՝ պարզ հաշվարկը ցույց է տալիս, որ մեկ էջի թարգմանության համար 8500 է ծախսվել, մինչդեռ որևէ մեկի համար գաղտնիք չէ, որ այդ ծառայության վճարները 1500-5000 դրամ են: Ուստի արդյոք վերահսկիչ պալատը արե՞լ է խորքային ուսումնասիրություն, պարոն Յոլյանը պատասխանեց. «Ինչ վերաբերում է կառավարության տարեկան հաշվետվության վերաբերյալ մեր գնահատականին, ապա մենք տալիս ենք արժանահավատության վերաբերյալ գնահատականը: Մենք այդ հաշվետվությունը ստանում ենք մայիսին և պարտավոր ենք մի քանի օր հետո եզրակացություն տալ: Մենք դա արդեն ֆիքսել ենք և տարվա ընթացքում գուցեև գտնենք, որ կարևոր է, կրկին վերահսկողական միջոցառումներ իրականացնենք»:
Իվետա Տոնոյանը կրկին արձագանքեց՝ մի՞թե ավելի լավ չի լինի, որ այս ամբիոնից նման հարցերի անդրադառնանք, մանավանդ հասարակության վստահության բարձրացման մասին ենք խոսում: Պարոն Յոլյանն արձագանքեց. «Այս ամբիոնում շատ ավելի լուրջ երևութային խնդիրներ պիտի դրվեն քննարկման»:
Պարոն Յոլյանը հայտնեց, թե ինքը բնավորությամբ լավատես է, և կանեն ամեն ինչ, որ 2017-ի հաշվետվությունը լինի պատգամավորների պահանջներին համապատասխան:
Տաթև ՀԱՐՈՒԹՅՈՒՆՅԱՆ
