Օգոստոսի 21-ից 26-ը Փարիզում կայանալիք ըմբշամարտի աշխարհի առաջնությանը նախապատրաստվող հունահռոմեական ըմբշամարտի Հայաստանի ազգային հավաքականը վերադարձել է Բելառուսից, որտեղ ուսումնամարզական հավաք էր անցկացնում «Ստայկի» օլիմպիական մարզաբազայում:
Հավաքականի գլխավոր մարզիչ Լեւոն Ջուլֆալակյանը գոհ է նախավերջին հավաքի ընթացքում կատարված աշխատանքից: «Համատեղ մարզվում էինք Բելառուսի, Ղազախստանի, Լիտվայի եւ Ֆինլանդիայի հավաքականների հետ: Բավականին արդյունավետ էր, հիանալի մարզումներ ենք անցկացրել: Հուսով եմ, որ այն նպատակին կծառայի»,- ասում է մարզիչը:
Թիմն այժմ նախապատրաստական վերջին փուլում է: Օգոստոսի 7-19-ը վերջին հավաքը կանցկացնենք Օլիմպավանում եւ օգոստոսի 19-ին կմեկնենք աշխարհի առաջնություն:Մեր կատարած աշխատանքից գոհ եմ: Մնում է եզրափակիչ հավաքը ճիշտ անցկացնենք եւ լավ մարզավիճակով մեկնենք: Մեր թիմում թափուր կլինի միայն գերծանր քաշային կարգը»,- ասում է մարզիչը:
Լեւոն Ջուլֆալակյանը թիմի վերջնական կազմը կհրապարակի օգոստոսի 10-ին:
Աշոտ ՀԱԿՈԲՅԱՆ
