Երևանի ավագանու Կրթության, մշակույթի և սոցիալական հարցերի մշտական հանձնաժողովը ձայների մեծամասնությամբ բացասական եզրակացություն է տվել «Ելք» խմբակցության անդամների կողմից առաջարկված փողոցների անվանակոչության նախագծերին: Թեմայի շուրջ քննարկումները շարունակվում են:
«Որ փողոցներն անվանափոխեն, թոշակներն ավելանալո՞ւ են, երկիրը դո՞ւրս գալիս ճգնաժամից»,- սեպտեմբերի 6-ին «Հենարան» ակումբում ասաց ճանաչված քանդակագործ Ֆերդինանտ Առաքելյանը:
Ապա մի պատմություն պատմեց. «Երբ Կոսիգինը 70-ականներին եկավ Հայաստան, տարան Մարտիրոս Սարյանի մոտ, Սարյանը հարցրեց` տղա ջան, որտե՞ղ ես ծնվել: Կոսիգինն ասաց` Լենինգրադում: Սարյանն էլ թե գուցե` Պետերբուրգո՞ւմ…Ինչու ամեն ինչ փոխել, էդպես որ լինի, պետք է ամեն ինչ ջնջես: Եթե շատ եք ուզում, նոր փողոց հիմնեք, ում անունն ուզում եք դրեք»:
Արվեստագետն ասաց, որ դեմ է կուսակցական «չափանիշներին», դրա համար էլ հրաժարվել է մասնակցել Արամ Մանուկյանի քանդակի մրցույթին: «Ասացի չեմ ուզում…Հերթով կգան իրար կջնջեն` հնչակները դաշնակներին, դաշնակները` կոմունիստներին…Իսկ դա ում է պետք»:
Նա ցավով խոսեց Հանրապետության հրապարակի Լենինի արձանի պատվանդանը քանդելու մասին. «Լավ, Լենինին հանեցինք, հասկացանք, բա պատվանդանն ինչի քանդեցին…Քանի՜ հատ նամակ ուղարկեցի Լեւոն Տեր-Պետրոսյանին, որ թույլ տան գոնե դրոշը Եռագույն դարձնեմ, չարեցին: Ո՞ր ազգը կգոյատեւի, եթե նա տառապում է վանդալիզմով…Ղուկաս Ղուկասյանն ինչ էր արել, Մարքսն ինչ էր արել , որ հանեցին, Պուշկինն ի՞նչ էր արել. գողացան կամ Չեխովը…»: Ֆերդինանտ Առաքելյանը համոզված է, որ դեռ կգա ժամանակը, երբ նման գործելաոճի մեղավորները կպատժվեն:
Գոհար ՀԱԿՈԲՅԱՆ
