Շիրակի նախկին մարզպետ, պատգամավոր Ֆելիքս Ցոլակյանն այսօր ԱԺ-կառավարություն հարցուպատասխանի ժամանակ հետաքրքրվեց Արթուր Ալեքսանյանի անվան հունա-հռոմեական ըմբշամարտի մարզադպրոցից. «Այդ մարզադպրոցը 5 տարի է՝ խոստանում են, որ պետք է անպայման վերանորոգեն, նախատեսված է 340 մլն դրամ, կա նախագիծ: Բյուջեի նախագիծն այսօր նայում եմ՝ չկա նորից այդ մարզադպրոցը: Լավ, Գյումրիում մարզադպրոց կառուցելը կամ վերանորոգելը շատ լավ բան է այն մարդու համար, ով դա անում է: Չէ՞ որ խոսքը վերաբերում է օլիմպիական մեր չենպիոնին եւ այդ մարդուն խոստումներ տալը եւ չանելը լավ չի»:
Սպորտի եւ երիտասարդության հարցերի նախարար Հրաչյա Ռոստոմյանը պատասխանեց. «Մենք ինչ խոստում տալիս ենք՝ իրականացնում ենք: Ալեքսանյանի անվան դպրոցի անմխիթար վիճակը մեզ հուշեց եւ մասնագետների ցուցումով մենք հասկացանք, որ դա վերանորոգելը սխալ է, պիտի նորը կառուցվի: Այս պահի դրությամբ մինչեւ ամսվա վերջ կվերջացնենք նախագծային աշխատանքները: Դուք քանի որ մարզպետ եք եղել, լավ գիտեք, որ դպրոցի կողքը տարածք կա եւ ժամանակին մի ընտանիք դպրոցի մեջտեղը տուն է սարքել իրեն: Այդ ամենից զերծ մնանք եւ Արթուր Ալեքսանյանին վայել միջազգային սպորտդպրոց ունենանք, որտեղ կանցկացվեն նաեւ Արթուր Ալեքսանյանի անվան միջազգային մրցաշար, որը կմտնի վարկանշային ցուցակի մեջ: Մեզ պետք է մոտ 700 հանդիսատեսի համար նախատեսվող նաեւ մարզադահլիճ ունենանք՝ միջազգային ստանդարտներով»:
Հաջորդ տարի արդեն կսկսվեն դպրոցի կառուցման աշխատանքները:
Նախարարն ասաց, որ սա ՀՀ նախագահի հանձնարարականով է եւ ՀՀ ազգային օլիմպիական կոմիտեի նախագահի համաձայնությամբ կիրականացվի եւ կֆինանսավորվի:
Ֆելիքս Ցոլակյանն արձագանքեց, որ այդ խոստումներին տեղյակ է եւ ասում է, որ դրանք չմնան թղթի վրա. «5 տարի է՝ այդ խոստումները կան: Եթե խոսք եք տվել, հույս ունենամ, որ կսկսվի, թող եկող տարի լինի»:
Հռիփսիմե ՋԵԲԵՋՅԱՆ
