Ավան եւ Նոր Նորք վարչական շրջանների ընդհանուր իրավասության դատարանում այսօր «Սասնա ծռեր» զինված խմբի անդամների գործով ամբաստանյալներից Պավել Մանուկյանի` դատավորին վիրավորելու գործով հերթական դատական նիստն էր:
Հիշեցնենք, որ այս գործով մեղադրյալի աթոռին միայն Պավել Մանուկյանն է: Նա մեղադրվում է նրանում, որ «Սասնա ծռերի» գործով նախորդ դատական նիստերից մեկի ընթացքում դատավոր Արտուշ Գաբրիելյանի հասցեին վիրավորական արտահայտություններ է ասել:
Այսօր նրա պաշտպաններից փաստաբան Հարություն Բաղդասարյանը դատավոր Սերգեյ Մարաբյանի դեմ ինքնաբացարկի միջնորդություն ներկայացրեց՝ այն հիմքով, որ նա ստանձնել է այս գործի քննությունը, մինչդեռ, պաշտպանի համոզմամբ, պետք է կարճեր վարույթը:
«Պավլիկ Մանուկյանի արարքում հանցակազմ չկա: Բացառվում է, որ դատավոր Արտուշ Գաբրիելյանը չիմանար, թե որն է հանցագործությունը: Քաջ գիտակցելով, որ հանցակազմ չկա, նա հաղորդում չի տվել հանցագործության մասին, մինչդեռ դուք կասկածի տակ եք դրել Արտուշ Գաբրիելյանի մասնագիտական կարողությունները եւ վարույթ ընդունել այս գործը, մինչդեռ այն պետք է վերադարձնեիք դատախազին: Հետեւաբար, ձեր վրա որոշակի ուժեր են ազդել, դուք կաշկանդված եք այս գործով»,-դիմելով դատավորին՝ ասաց Հարություն Բաղդասարյանը:
Նա նկատեց, որ այս գործով նախաքննական մարմինն անգամ տուժողին՝ Արտուշ Գաբրիելյանին չի ներգրավել, ուստի գործը պետք է կարճել. «Արտուշ Գաբրիելյանն անգամ չի էլ բողոքել իրեն վիրավորելու փաստի առնչությամբ: Նա արդյոք տեսե՞լ է հանցագործության հատկանիշներ: Եթե այո, ապա ինչո՞ւ չի բարձրաձայնել այդ մասին»:
Դատավոր Սերգեյ Մարաբյանը նշվածի մասին կարծիք հարցրեց նաեւ մեղադրյալ Պավել Մանուկյանից. «Կարծում եք՝ ինձ վրա ազդեցությո՞ւն կա»: Պավել Մանուկյանն այսպես պատասխանեց. «Ափսոսալու վիճակում եք: Ես ձեզ որպես մարդ եմ ընդունում, բայց չգիտեմ՝ ի՞նչ «օյին» են բերելու ձեր գլխին»:
Սերգեյ Մարաբյանն արձագանքեց. «Ի՞նչ խոստում տամ, որ հավատաք՝ ես անկախ եմ աշխատում: Այսքան ժամանակ չի եղել մի գործ, որը ես իմ խղճով լուծած չլինեմ»:
Դատավորը վստահեցրեց, որ այս գործը եւս քննելու է օրենքի տառին համապատասխան եւ որոշեց պաշտպանի միջնորդությունը թողնել առանց քննության:
Լուիզա ՍՈՒՔԻԱՍՅԱՆ
