Քրեակատարողական հիմնարկներում վերջերս աղմուկ էր բարձրացել պայմանական վաղաժամկետ ազատման անկախ հանձնաժողովների շուրջ: Թերեւս այդքան բարձրաձայնելուց հետո հանձնաժողովականները փոխել են մոտեցման սկզբունքները: Բայց հիմա էլ դատավորներն են սկսել «համը հանել»: Ըստ դատապարտյալների հարազատների` անկախ հանձնաժողովը դրական եզրակացություն է տվել, ենթադրենք, կարգապահ դատապարտյալի, որին մի քանի ամիս է մնում, որ ազատվի, սակայն դատավորները մերժում են:
«Իսկ ասենք հանձնաժողովի դաբրոն չստացած, մի քանի անգամ դատված, բազմաթիվ տույժերը վրան բանտարկյալի դատավորը հինգ րոպեում ազատում է»,- պատմեցին խմբագրություն ահազանգած դատապարտյալների հարազատները: Նրանք չցանկացան, որ հիշատակվեն իրենց անունները: «Վաղը կարող է էլի էդ նույն դատավորին հասնի գործը, իզուր չլարվի երեխեքի դեմ»,-նշեցին նրանք:
Դատապարտյալներն իրենց հարազատներին պատմել են, որ դատավորների մոտ նախապես պատրաստի ցուցակ է լինում: «Օղակի մեջ ում անունը լինում է՝ ազատում են»,-ասացին նրանք:
Դավիթ ԱՐՄԵՆՅԱՆ