Արդեն չորրորդ օրն է շարունակվում է Ջերմուկ քաղաքի, հարակից Կեչուտ եւ Գնդեվազ գյուղի բնակիչների բողոքի ակցիան: Նրանք փակել են դեպի Ամուլսարի ոսկու հանք գնացող ճանապարհները՝ թույլ չտալով հանքի մեքենաների տեղաշարժը, որի արդյունքում հանքի աշխատողները չեն կարողանում մեկնել աշխատանքի վայր: Այսօր էլ բողոքավոր բնակիչները կրակ են վառել`ողջ գիշեր մնալու են դրսում, մեքենաներով էլ ճանապարհներն են փակել:
«Աստված էլ վերեւից իջնի`հանքը չենք բացելու: Եթե հանքարդյունաբերողները այս նախնական փուլում չեն կարողանում ապահովել բնակչության անվտանգությունը, ի՞նչ կլինի, հանքի շահագործման փուլում»,- քիչ առաջ, ֆեյսբուքյան ուղիղ եթերից հայտարարեց ցուցարարներից մեկը:
Հիշեցնենք, Ամուլսարի ոսկու հանքի շահագործման դեմ պայքարը սկսվել է 2012 թվականից, բայց արդյունքներ չկան: Պատճառն, ըստ ցուցարարների, այն է, որ մինչ օրս կառավարությունն իրենց հետ չի եղել. «Հիմա կառավարությունը ժողովրդամետ է եւ մենք շատ հույսեր ունենք»:
Պայքարի այս փուլը սկսվել է նրանից, որ Կեչուտ եւ Գնդեւազ գյուղում ջրագծեր են վնասվել եւ խմելու ջրի ծորակներից ցեխաջրեր են գալիս: «Երեք անգամ արդեն ջրագիծը վնասվել է: Երկու անգամ բողոքներ են եղել, երրորդ անգամ համբերությունը հատեց»,- հայտարարեց ցուցարարներից մեկը:
Ցույցի մասնակիցները մտադիր են խաղաղ ցույցերը շարունակել այնքան, մինչեւ իրենց ձայնը լսելի դառնա, իսկ խնդիրը`լուծում ստանա:
Նելլի ԳՐԻԳՈՐՅԱՆ
