2018 թվականին Հայաստանում կանխատեսում է 4.1% տնտեսական աճ, իսկ 2019 և 2020 թվականներին՝ 4%: Այս մասին ասվում է Համաշխարհային բանկի «Համաշխարհային տնտեսական հեռանկարները» զեկույցում:
Զեկույցի համաձայն՝ 2018 թվականին համաշխարհային տնտեսության աճի տեմպերը կմնան 3.1 տոկոսի մակարդակում՝ չնայած վերջին շրջանում տեղ գտած դանդաղեցմանը, իսկ հետագա երկու տարիներին աստիճանաբար կնվազեն զարգացած երկրներում տնտեսական աճի դանդաղեցման պատճառով:
Համաշխարհային բանկի կանխատեսումների համաձայն՝ տարածաշրջանի երկրներից ամենաբարձր տնտեսական աճ կգրանցեն Վրաստանը և Թուրքիան՝ յուրաքանչյուրը 4.5%: Ադրբեջանում այս տարի կանխատեսվում է 1.8% աճ, իսկ Ռուսաստանը, ըստ կանխատեսումների, այս տարի կգրանցի 1.5% աճ:
Նշվում է նաև, որ միջնաժամկետ հեռանկարում էներգիայի գների կանխատեսումը, որոնք սպասվածից ավելի քիչ են, կվնասի տնտեսության վերականգնմանը տարածաշրջանի էներգիա արտահանող այնպիսի երկրներում, ինչպիսիք են՝ Ղազախստանը, Ռուսաստանը և Ուզբեկստանը, ինչը կարող է բացասական հետևանքներ առաջացնել հարևան երկրներում՝ Հայաստանում, Բելառուսում, Վրաստանում, Ղրղզստանում, Մոլդովայում և Տաջիկստանում:
Պատրաստեց՝ Վիկտորյա ԱՆԴՐԵԱՍՅԱՆԸ