Հայաստանի երիտասարդ կանանց ասոցիացիայի նախագահ, Rafting.am մարզական ակումբի հիմնադիր Լիլիթ Ասատրյանը օգոստոսի 11-ին Դեբեդ գետում կայանալիք սիրողական ռաֆթինգի Հայաստանի անդրանիկ առաջնության առիթով ԶԼՄ-ների հետ հանդիպման ժամանակ ասաց.
«Ռաֆթինգը Հայաստանի համար կարեւոր էքստրեմալ մարզաձեւ է եւ զբոսաշրջության զարգացման կարեւորագույն խթան: Սակայն ռաֆթինգը նաեւ շատ թանկ զբաղմունք է, որը լրացուցիչ ներդրումների եւ ծախսերի անհրաժեշտություն ունի: Հիմա սպորտի եւ երիտասարդության հարցերի նախարարությունը մեծ ուշադրությամբ հետեւում է ռաֆթինգի գործունեությանը Հայաստանում՝ առաջին հերթին որպես մարզաձեւի: Մենք հասկանում ենք, որ մեր պետությունը չի կարող աջակցել բոլոր մարզաձեւերին: Սրա լուծումներից մեկն այն է, որ զբոսաշրջիկները, տեղացիները, ինչը շատ կարեւոր է, այս հաճելի զբաղմունքի համար օգտվում են այս էքստրեմալ մարզաձեւից եւ այդ գումարները նպաստում են ռաֆթինգի զարգացմանը:
Ուզում եմ ընդգծել, որ մեր ծրագիրը Հայաստանում սկիզբ եւ հաջողություն չէր ունենա, եթե մենք չունենայինք ՄԱԿ-ի զարգացման ծրագրի ինտեգրված գյուղական զբոսաշրջության ծրագրի աջակցությունը: Երբ մենք մոտ մեկ տարի առաջ ՄԱԿ-ի զարգացման ծրագրին ներկայացրինք ռաֆտինգ իրականացնելու մեր ամբողջական ծրագիրը, շատերը ծիծաղում էին, անգամ հիմարություն համարում: Բայց մենք հավատում էինք հաջողությանը: Երբ մենք հունիսի 26-ին տվեցինք Rafting.am ծրագրի մեկնարկը, դրանից հետո անցած այս կարճ ժամանակահատվածում առաջարկները էապես ավելացել են ու Rafting.am ակումբի գործունեության շրջանակները ընդլայնվել»:
Աշոտ ՀԱԿՈԲՅԱՆ
