Ռուսաստանում Հայաստանի արտակարգ և լիազոր դեսպան Վարդան Տողանյանը «Կոմսոմոլսկայա Պռավդա» ռադիոկայանի ուղիղ եթերում պատասխանել է «Պարզ բառերով» հաղորդաշարի լրագրողների և ռադիոլսողների հարցերին, որոնց, մասնավորապես, հետաքրքրում էր, թե ի՞նչ է փոխվել Արարատի փեշերին թավշյա հեղափոխությունից հետո և ինչպիսին են Հայաստանի հարաբերությունները Ռուսաստանի հետ այդ հեղափոխությունից 150 օր անց:
Դեսպանը իր խոսքում վստահեցրեց, որ Ռուսաստանի և Հայաստանի հարաբերություններում ոչինչ չի փոխվել և չնայած, որոշ վերլուծաբանների թերահավատ կանխատեսումներին, Ռուսաստանը այսօր էլ մնում է Հայաստանի գլխավոր տնտեսական գործընկերներից մեկը և հեղափոխությունից հետո երկրների միջև 23 տոկոսանոց աճ է արձանագրվել՝ առևտրա-տնտեսական շրջանառություն առումով:
Ըստ դեսպանի, այս տարվա առաջին կիսամյակի տվյալներով այդ շրջանառությունը գրանցել է 1,2 միլիարդ դոլարի ցուցանիշ, այն պարագայում, երբ այդ առումով ռեկորդային համարվող 2017 թվականին այդ ցուցանիշը եղել է 1,7 միլիարդ դոլար:
Հայաստանի Հանրապետության դեսպանի հարցազրույցը, որտեղ անդրադարձ եղավ հայ-ռուսական հարաբերությունների բոլոր կողմերին՝ առևտրային, քաղաքական, մշակութային և հասարակական, «Կոմսոմոլսկայա Պռավդա» ռադիոկայան կողմից Հայաստանը և այնտեղ կատարվող ներքաղաքական զարգացումները դրական լույսի տակ ներկայացնելու առաջին փորձն էր՝ թավշյա հեղափոխությունից ի վեր և այն հաջողվեց:
Հիշեցնենք, որ «Կոմսոմոլսկայա Պռավդան» հրատարակչական տունը զանգվածային լսարան ունեցող ռուսաստանյան դաշնային լրատվամիջոցներից մեկն է, որը հայկական թավշյա հեղափոխության օրերին մեծ պարբերականությամբ և ամենաբացասական լույսի տակ էր ներկայացնում Հայաստանում տեղի ունեցող իրադարձությունները՝ փորձելով դրանց տալ հակառուսական աստառ:
Նաիրա Բաղդասարյան
https://www.youtube.com/watch?v=exKov-ec8c4&app=desktop
