Մարտի 1-ի գործով մեղադրյալ ՀՀ երկրորդ նախագահ Ռոբերտ Քոչարյանի փաստաբան Հայկ Ալումյանը հայտարարել է, որ նույն գործով մեղադրյալ Միքայել Հարությունյանին (լուսանկարում) 2007-ին պաշտպանության նախարար նշանակելիս Քոչարյանը տեղյակ չի եղել, որ վերջինս ՌԴ քաղաքացի է:
Հայկ Ալումյանը Aravot.am-ի հետ զրույցում հիշեցրեց Միքայել Հարությունյանի կենսագրությունը, նա 1992-ից պաշտոններ է զբաղեցրել ՀՀ Զինված ուժերում:
Հիշեցնենք, որ 1992-ին Միքայել Հարությունյանը նշանակվել է ՀՀ Զինված ուժերի գլխավոր շտաբի պետի տեղակալ, իսկ 1994-2007 թվականը նշանակվել է շտաբի պետ: Հիշեցնենք նաեւ, որ 1992-ի հունվարի 28-ին ՀՀ նախագահ Լեւոն Տեր-Պետրոսյանն է ստորագրել ՀՀ Զինված ուժերի ստեղծման մասին հրամանագիրը եւ Տեր-Պետրոսյանի նախագահության տարիներին է Հարությունյանը ստանձնել ՀՀ Զինված ուժերի գլխավոր շտաբի պետի տեղակալի, իսկ հետագայում նաեւ շտաբի պետի պաշտոնը:
«Եթե մինչեւ 2007 թվականը Միքայել Հարությունյանն աշխատել է Զինված ուժերում, ո՞վ պետք է ստուգեր քաղաքացիության հարցը մինչեւ նշանակելը, մի մարդ, ում մասին հիմա ոչինչ չի խոսվում: Նախ սկզբում նրանց հարցրեք՝ ինչու չեն ստուգել, որովհետեւ 2007-ին նրան նախարարի պաշտոնում նշանակողը, եթե գիտի՝ այս մարդը 15 տարի ամենաբարձր պաշտոններն է զբաղեցրել համակարգում, որտեղի ՞ց պետք է ենթադրեր, որ քաղաքացիության խնդիր կլինի: Այդ հարցերն ուղղեք նրանց, որոնք 1992 թվականից պարոն Հարությունյանին նշանակել են Զինված ուժերի շտաբի պետի տեղակալի ու պետի պաշտոններում, նրա նշանակման հրամանագիրը ստորագրողից հարցրեք, տեսնենք՝ ինքը ինչ է ասում, հետո կանցնենք իմ պաշտպանյալին, մենք կմեկնաբանենք՝ ինչու է Հարությունյանը դրանից 15 տարի անց շարունակել աշխատել»,- ասաց Հայկ Ալումյանը:
Հիշեցնենք, որ Մարտի 1-ի գործով մեղադրյալ, ՀՀ պաշտպանության նախկին նախարար Միքայել Հարությունյանը ՌԴ քաղաքացի է․ այդ երկրի քաղաքացիություն է ունեցել նաև նշանակման պահին, ինչը ՀՀ սահմանադրության կոպիտ խախտում է։
Արփինե ՍԻՄՈՆՅԱՆ
