Ինքնաթիռով ճամփորդող ուղեւորներին մասնագետները խորհուրդ են տալիս նստատեղերն ընտրել ըստ նախասիրությունների եւ վախի, որպեսզի թռիչքը տեղի ունենա առավել հարմարավետ պայմաններում:
«The Sun» բրիտանական պարբերականին տված հարցազրույցում օդաչու Ջոնի Նոուլսոնը մի քանի կարեւոր խորհուրդներ է տալիս ուղեւորներին: Թռիչքների ժամանակ տուրբուլենտությունից վախեցող ուղեւորներին օդաչուն խորհուրդ է տալիս տեղերն ընտրել օդանավի սրահի մեջտեղում՝ թեւերին մոտ եւ ոչ մի դեպքում չնստել ինքնաթիռի պոչի հատվածում: Նրանք, որոնք փնտրում են սրահի ամենախաղաղ հատվածը, ապա պետք է տեղն ընտրեն օդանավի շարժիչներից հնարավորինս հեռու վայրում:
Եթե, ըստ օդաչու պարոն Նոուլսոնի, այդ տեղերն արդեն զբաղված են, ապա, պետք է նստատեղն ընտրել ինքնաթիռի սրահի միջանցքին մոտ: Օդաչուի խոսքով, ճիշտ է միջանցքին մոտ տեղն ավելի քիչ գրավիչ է, բայց շատ ավելի հանգիստ է:
Կարդացեք նաև
Նրանք, որոնք վախենում են հիվանդանալ, մասնագետները խորհուրդ են տալիս տեղերը չընտրել օդանավի դռներին մոտ, քանի որ, ինքնաթիռի մյուս տեղերի համեմատությամբ, այդ հատվածում ջերմաստիճանն ավելի ցածր է: Ամենատաք հատվածները համարվում են օդանավի հետնամասի նստատեղերը:
Ինքնաթիռի պոչի հատվածում թռիչքը հարմարավետ կլինի նաեւ այն ուղեւորների համար, որոնք ունեն ձեռքի մի քանի ուղեբեռ, ինչպես նաեւ այն ուղեւորների, որոնց հետ երեխաներ կան: Հիմնականում զուգարանները գտնվում են օդանավի հետնամասում, այդտեղ են տեղակայված նաեւ երեխաների հագուստները փոխելու սեղանիկները: Նրանք, որոնք բոլորից շուտ են ուզում սնունդը ստանալ, պետք է նստեն օդանավի սկզբնամասում:
Ի դեպ, «Airbus» եւ «Zodiac Aerospace» ընկերությունները հայտարարել են, որ էկոնոմ դասով թռչող ուղեւորների համար էլ կլինեն քնի համար նախատեսված հարմարություններ: Այդ մոդելը վերոնշյալ ընկերությունները ներկայացրել են անցյալ տարի Համբուրգում տեղի ունեցած «Aircraft Interiors Expo 2018» ցուցահանդեսի ժամանակ:
Պատրաստեց՝ Լուսինե ԲՈՒԴԱՂՅԱՆԸ
