Շիրակի մարզպետ Տիգրան Պետրոսյանն այսօր խորհրդակցություն է անցկացրել ՀՀ ոստիկանության Շիրակի մարզային վարչությունում, որին մասնակցել են մարզպետարանի պաշտոնյաներն ու ոստիկանության աշխատակիցները։ Թեման եղել է զբոսաշրջության սեզոնին ընդառաջ Գյումրին անվտանգ դարձնելը։ Այս մասին տեղեկանում ենք Շիրակի մարզպետարանի ֆեյսբուքյան էջից։
Հիշեցնենք, որ Գյումրին վերջին շրջանում դարձել է բավական վտանգավոր քաղաք․ այստեղ ավելացել է գողությունների թիվը։ Այդ մասին բարձրաձայնել է նաև Շիրակի դատախազ Կարեն Գաբրիելյանը։ Գյումրին անվտանգ չէ նաև ընթացող լայնածավալ փողոցաշինության առումով․ լարված իրավիճակ է ստեղծվել ոչ միայն վարորդների, այլ հետիոտների համար։
«Երբ մենք ուսումնասիրում ենք 2018-ի տուրիստական հոսքերն ու 2019-ի ազդակներին ենք հետևում՝ հասկանալի է դառնում, որ այս տարի մեզ մոտ բավական լուրջ զբոսաշրջային հոսքեր են լինելու, ինչը նշանակում է, որ մենք պետք է պատրաստ լինենք բոլոր տեսանկյուններից: Մեր քաղաքը որքան հնարավոր է շուտ պետք է ներկայանալի դառնա, խոսքս փողոցաշինական աշխատանքներին է վերաբերում, ինչպես նաև պետք է լինի հնարավորինս անվտանգ»,- նշել է Տիգրան Պետրոսյանը:
Կարդացեք նաև
Մարզպետարանի ֆեյսբուքյան էջում տեղադրած լրատվությունից նաև տեղեկանում ենք, որ Շիրակի մարզպետն այս առումով կարևորել է մարզային ոստիկանության հետ համագործակցությունը։
«Ես, որպես մարզպետ, հայտնում եմ իմ պատրաստակամությունը համագործակցելու, անվտանգ մարզ, անվտանգ քաղաք ունենալու համար: Այս առումով անելիք ունենք բոլորս»,- ասել է մարզպետ Պետրոսյանը։
Շիրակի ոստիկանապետ Սևան Քոչարյանը ևս իր մեծ պատրաստակամությունն է հայտնել համագործակցության ու արդյունքում պայմանավորվածություն է ձեռքբերվել ոլորտային խնդիրների լուծման համար ստեղծել աշխատանքային խումբ, որի կազմում կլինեն ոստիկանության, մարզային ու քաղաքային իշխանությունների ներկայացուցիչներ:
Հանդիպման ընթացքում խոսվել է նաև ճանապարհային ոստիկանության աշխատանքի մասին, քննարկվել անվտանգ երթևեկությանը, ճանապարհային գծանշումներին, տեսանկարահանող սարքեր տեղադրելու անհրաժեշտությունը։
Նունե ԱՐԵՎՇԱՏՅԱՆ
Լուսանկարները՝ Շիրակի մարզպետարանի
