Դատավոր Աննա Դանիբեկյանը, որը քննում է Ռոբերտ Քոչարյանի գույքի վրա դրված կալանքի գործով պաշտպանական խմբի բողոքը, կողմերին լսելուց հետո քիչ առաջ հեռացավ խորհրդակցական սենյակ՝ վճիռ կայացնելու:
Այսօր Երեւան քաղաքի ընդհանուր իրավասության դատարանի Շենգավիթ նստավայրում շարունակվեց ՀՀ երկրորդ նախագահ Ռոբերտ Քոչարյանի գույքի վրա դրված կալանքի գործով դատավարությունը:
Նշենք, որ Ռոբերտ Քոչարյանին սահմանադրական կարգի տապալման մեղադրանք առաջադրելուց հետո 2018 թ. հուլիսի 30-ին Հատուկ քննչական ծառայության քննիչի որոշմամբ նրա ողջ գույքի վրա կալանք դրվեց։ Քոչարյանի պաշտպաններն այս որոշումը բողոքարկեցին դատախազին, սակայն նրանց բողոքը մերժվեց: Պաշտպանական կողմը դիմեց դատարան:
Այսօր դատարանում Ռոբերտ Քոչարյանի պաշտպան Հովհաննես Խուդոյանը դատարանին ներկայացրեց ՀՀ նախկին փոխվարչապետ Արմեն Գեւորգյանի գույքի վրա դրված կալանքի վերաբերյալ դատարանի որոշումը, համաձայն որի դատարանը այդ հարցում իրավունքի խախտում է գրանցել: Ըստ պաշտպան Հովհաննես Խուդոյանի, Ռոբերտ Քոչարյանի գույքի վրա այն ժամանակ է դրվել կալանք, երբ նրան առաջադրվել էր միայն մեկ` Սահմանադրական կարգը տապալելու մեղադրանք, իսկ այդ մեղադրանքը չի ենթադրում գույքի արգելանք: Պաշտպանի խոսքով, դա նույնն է, որ «անձին անհիմն կալանավորեն, հետո որեւէ հանցանք գործի ու փորձեն ասել, թե կալանքը հիմնավոր է»:
Կարդացեք նաև
Դատախազ Վահե Դոլմազյանն ասաց, որ իրենց կարծիքով Քոչարյանի գույքի վրա դրված կալանքը հիմնավոր է:
Ըստ դատարանի, վճիռը կհրապարակվի վաղը 12 անց 20-ին:
Հիշեցնենք, որ ավելի վաղ արգելանք էր դրված նաեւ Ռոբերտ Քոչարյանի կենսաթոշակային հաշվեհամարի վրա, որը, սակայն Մարդու իրավունքների պաշտպանի պահանջով հանվել էր:
Լուսինե ԲՈՒԴԱՂՅԱՆ
