ԱԺ Ֆինանսավարկային եւ բյուջետային հարցերի մշտական հանձնաժողովի այսօրվա նիստում պատգամավորները քննարկեցին «Հայաստանի Հանրապետության եւ Ամերիկայի Միացյալ Նահանգների միջեւ «Օտարերկրյա հաշիվների հարկային համապատասխանության ակտի» կիրարկմանն օժանդակելու համագործակցության մասին» համաձայնագիրը վավերացնելու մասին հարցը: Այս համաձայնագիրը վերաբերում է ԱՄՆ հարկային համակարգին, այն կնքված է 113 երկրի հետ:
ՀՀ Կենտրոնական բանկի նախագահի տեղակալ Ներսես Երիցյանը տեղեկացրեց, որ դեռեւս 2010թ.-ին ԱՄՆ Կոնգրեսն ընդունել է օրենք՝ օտարերկրյա հաշիվների հարկային համապատասխանության առնչությամբ: Դրա նպատակն է՝ բացահայտել ԱՄՆ քաղաքացի հանդիսացող բոլոր նրանց, ովքեր արտասահմանյան կամ օֆշորային ֆինանսական կազմակերպությունների միջոցով փոխանցումներ եւ ներդրումներ են անում՝ խուսափելով ԱՄՆ աղբյուրներից ստացված միջոցների հարկերի վճարումից:
«ՀՀ-ն ԱՄՆ-ի հետ համաձայնագիրը սկսել է մշակել հենց այդ թվականից: Հայաստանյան բանկերը պետք է գրանցվեն ԱՄՆ հարկային մարմնում եւ հաշվետվություն տրամադրեն: 2018թ.-ին համաձայնագրի բանակցային գործընթացն ավարտվեց: Ներքին ընթացակարգերն ավարտված են: Հայաստանյան բանկերի հաճախորդները, որոնք հանդիսանում են «ամերիկյան անձ»՝ ԱՄՆ քաղաքացի համարվող հաշվետեր, կամավոր պետք է տան համաձայնություն՝ տեղեկատվություն տրամադրելու ԱՄՆ հարկային մարմիններին: Եթե բանկը չի ճշտել անձի՝ «ամերիկյան անձ» լինելու փաստը, եւ եթե նա որեւէ կերպ խուսափել է հարկերից, հայաստանյան բանկի հաշիվն ԱՄՆ-ում կարող է փակվել: Այսինքն, ԱՄՆ բանկերը պարտավոր են փակել այն հաշիվները, որոնք ճշտված չեն, եւ որոնց վերաբերյալ հաշվետվություն չի ներկայացվում ԱՄՆ հարկային մարմնին»,-նշեց Ներսես Երիցյանը:
Լուիզա ՍՈՒՔԻԱՍՅԱՆ
