ԱԳՆ փոխարտգործնախարար Շավարշ Քոչարյանը հայտարարել էր, որ նախապատրաստվում է ԵԱՏՄ-Սինգապուր ազատ առեւտրի գոտի համաձայնագիրը, արդյոք Իրանի, Սինգապուրի եւ Ռուսաստանի ղեկավարները հաստատե՞լ են իրենց այցը Հայաստան: ԱԳՆ մամուլի խոսնակ Աննա Նաղդալյանն ի պատասխան լրագրողի այս հարցին, հայտնեց, որ ղեկավարների այցի հետ կապված քանիցս մեկնաբանություն եղել է, իսկ ԵԱՏՄ-ի այս միջոցառմանը առաջնահերթություն է տրվել Հայաստանի կողմից , եւ ԵԱՏՄ-ի այս միջոցառման լավագույնս անցկացումը ՀՀ նախագահության գերակայություններից մեկն է:
«Մեր նախագահության եւ ԵԱՏՄ-ի վերաբերյալ վերաբերմունքից է գալիս այն, թե Հայաստանն ինչպիսի առաջատար ներգրավվածություն է ունեցել Իրանի եւ Սինգապուրի հետ նշյալ շրջանակի ամրագրման գործում»,-ասաց նա:
ԱՄՆ նախագահի ազգային անվտանգության հարցերով խորհրդական Ջոն Բոլթոնի հրաժարականին եւս անդրադարձ եղավ: Լրագրողներից մեկին հետաքրքրում էր, թե ինչ ազդեցություն կունենա հայ-ամերիկյան հարաբերությունների վրա այդ հրաժարականը:
«ԱՄՆ-ի հետ ՀՀ-ն ունի ակտիվ երկխոսություն` տարբեր մակարդակներում: Մենք պատրաստակամ ենք շարունակել քայլերն այդ ուղղությամբ: ԱՄՆ-ի հետ ՀՀ հարաբերությունները պայմանավորված չեն առանձին անձերով եւ դրանք կրում են առավել ինստիտուցիոնալ բնույթ»,-ասաց ԱԳՆ խոսնակը:
Կարդացեք նաև
ՀԱՊԿ անդամ երկրների կողմից Ադրբեջանին զենք վաճառելու վերաբերյալ էլ նշեց. «Ադրբեջանին զենքի վաճառքի հարցում ՀԱՊԿ որոշ անդամ պետությունների ներգրավվածության մասին մեր մտահոգությունները բարձրաձայնվել են: Մեր դիրքորոշումն այն է, որ դա բացասական ազդեցություն ունի ինչպես կառույցի հեղինակության, այնպես էլ համագործակցության միջավայրի վրա: Հետեւողականորեն քայլեր ենք ձեռնարկելու, որպեսզի բացառենք ՀԱՊԿ անդամ պետության կողմից ուժ կամ ուժի սպառնալիքի կիրառման պատրանքը»:
Արցախում կայացած ընտրություններին Վրաստանի եւ Ուկրաինայի արձագանքների մասին էլ հարց հնչեց: «1991թ.-ից Արցախում անխափան իրականացվել են ՏԻՄ, նախագահական եւ խորհրդարանական ընտրություններ, որոնք Արցախի ժողովրդի կողմից իրենց իրավունքների իրացման շարքին են դասվում: Ինչպես արձանագրել են դիտորդական առաքելություն իրականացրած կազմակերպությունները եւ դիտորդները, այդ ընտրություններն անցկացվել են ժողովրդավարական չափանիշներին համապատասխան: Այդ 28 տարվա ընթացքում Արցախը կուտակել է ժողովրդավարական ընտրություններ անցկացնելու փորձ, ինչը ի ցույց է դնում Արցախի լրջությունը եւ կարողությունը կառուցելու ժողովրդավարական ինստիտուտներ եւ երաշխավորելու մարդու ազատ կամարտահայտությունը:
Կարող եմ վկայակոչել նաեւ ԵԱՀԿ Մինսկի խմբի հայտարարությունն առ այն, որ իրենք ճանաչում են Արցախի բնակչության սեփական ապագայի հանդեպ որոշում կայացնելու դերը: Մեր սկզբունքային դիրքորոշումն այն է, որ մարդու իրավունքների իրացումը պայմանավորված չէ իրենց բնակության վայրի կարգավիճակով, մարդու իրավունքների չճանաչումը որեւէ կերպ չի սահմանափակում դրանց իրացումը, այն պարզապես անհարմար իրադրության մեջ է դնում այն կողմերին, որոնք նման հայտարարություն են անում»,-ասաց Աննա Նաղդալյանը:
Գոհար ՀԱԿՈԲՅԱՆ
