Այն, ինչ կատարվում էր 2019թ. հոկտեմբերի 17-ի երեկոյան Կարեն Դեմիրճյանի անվան մարզահամերգային համալիրում, այլ կերպ, քան շքեղության հրավառություն, դժվար է անվանել… նորաձեւ խոհարարությունը՝ հանձին «Երեմյան Փրոջեքթս» ընկերության եւ համեղ նորաձեւությունը՝ հանձին «Հարմոնի Երեւան» նորաձեւության տան, համատեղ ներկայացրեցին GASTRO COUTURE միջոցառումը, որում միաձուլվել էին գեղեցիկն ու համեղը, նորաձեւությունն ու գաստրոնոմիան:
GASTRO COUTURE-ն իրենից ներկայացնում էր հայկական ավանդական ուտեստների գույների և հյուրընկալության կոնցեպտուալ հիմքով ստեղծված զգեստների հավաքածուի նորաձևության բացառիկ ցուցադրություն՝ հենց ավանդական ուտեստների եւ գեղեցիկ զարդարված սեղանի ֆոնին:
GASTRO COUTURE նախագծի նպատակը հայկական ավանդական խոհանոցը նորովի և ֆյուժնի համատեքստում ներկայացնելն է:
Խոսելով GASTRO COUTURE նախագծի գաղափարի և նպատակների մասին՝ «Երեմյան Փրոջեքթս» ընկերության գլխավոր տնօրեն Դավիթ Երեմյանն ասաց.
Կարդացեք նաև
«GASTRO COUTURE-ը մեր պատկերացումների մարմնավորումն է, այն է՝ հայկական խոհանոցն ու մշակույթը ներկայացնել նորովի, ցույց տալ, որ խոհանոցը ոգեշնչման աղբյուր է, արվեստ, և այդ արվեստը սահմաններ չի ճանաչում՝ լինի դա խոհանոց, թե՜ նորաձևություն։ Երկու տարբեր, բայց միաժամանակ համատեղելի աշխարհներ, որոնց միաձուլումից ստացվում է բարձր արվեստի նոր գործ: Սա հնարավորություն է ցույց տալ, որ խոհանոցն էլ կարող է լինել նորաձև։ Այս գեղեցիկ մտահղացումն իրագործում ենք մեր գործընկերների՝ «Հարմոնի Երևան» նորաձևության տան հետ, որի բարձրակարգ և պրոֆեսիոնալ մասնագետներին ոգևորեց այս գաղափարն ու թևեր տվեց մեզ հետ բարձր թռչելու դեպի GASTRO COUTURE-ի աշխարհ»։
Խոսելով GASTRO COUTURE ցուցադրության կոնցեպտի և ներկայացված հավաքածուի մասին՝«Հարմոնի Երևան» նորարձևության տան հիմնադիր Լիլիթ Տոնականյանը նշեց.
«Ինչպես մեր նախորդ ցուցադրությունները, այս մեկը ևս առանձնանում է իր կոնցեպտով։ Կոնցեպտը խնջույքն է. ցուցադրության առաջին մասում ներկայացված էին ճաշկերույթի պատրաստվելու ընթացքը. շեշտել ենք սպասքադրման գործընթացի կարևորությունը: Օգտագործվել են տարրեր հայկական հենց այն ավանդական ուտեստներից, որոնց հաճախորդը կարող է հանդիպել «Երեմյան Փրոջեքթս» ընկերության ռեստորաններում։ Եվ, իհարկե, ցանկացել էինք ընդգծել ռեստորան գնալիս պատրաստվելու արարողակարգի կարևորությունն ու էսթետիկան։ Այստեղ մարդիկ են, կերպարներ, ովքեր մասնակցում են ճաշկերույթի որևէ բարձրակարգ ռեստորանում և իրենց տեսքն էլ նույնքան տարբերվող է, որքան այդ ռեստորանի խոհանոցը»:
Ցուցադրության կոնցեպտն ամբողջականցված էր յուրահատուկ ձևավորման և հյուրասիրության միջոցով, ինչ միջոցառմանը հաղորդում էր հայկական արքունական խնջույքի մթնոլորտ: Դահլիճում ներկայացված էր 50 մետր երկարությամբ առատ սեղան՝ լի հայկական ավադական ուտեստներով և քաղցրավենիքով՝ ղափամա, տոլմա, ժենգյալով հաց, գաթա, հայկական չրեր և մրգեր, որոնք ցուցադրության ավարտից հետո վայելեցին հյուրերը:
Ցուցադրության երկու մուտքերը զարդարված էին «Հայկական գորգի ազգային կենտրոնի» զարդանախշ գորգերով, որոնք ողջ շքեղությամբ ներդաշնակ ձևով գույն էին հաղորդում միջոցառմանը և խորհրդանշական էին:
Միջոցառմանը ներկա էին պետական, գործարար, մշակույթի, արվեստի, ռեստորանային և նորաձևության ոլորտների ներկայացուցիչներ, հյուրեր արտերկրից, լուսանկարիչներ և տեղական ու միջազգային լրատվամիջոցներ:
GASTRO և COUTURE աշխարհները միավորող և յուրովի մեկնաբանող գաղափարակիցները հույս հայտնեցին, որ այս միջոցառումը կնպաստի ինչպես հայկական ավանդական խոհանոցի, այնպես էլ հայկական նորաձևության ճանաչելիության մակարդակի բարձրացմանն ու տարածմանն ամբողջ աշխարհում:
Լուսանկարները՝ Նարեկ Ավագյանի
