Հայտնի մարզական մեկնաբան Սուրեն Բաղդասարյանը մեկ բառով նկարագրեց կայացած ընտրությունները՝ խայտառակություն։ «Խայտառակություն էր այն առումով, որ այսքան տարիների ընթացքում առաջին անգամ հնարավորություն կար, որ ֆուտբոլային ընտանիքն ընտրի իր ղեկավարներին, բայց, փաստորեն, ավելի վատ տարբերակով անցան այդ ընտրությունները, քան այն ժամանակ, երբ իշխանությունները միջամտում էին եւ իրենց թեկնածուին էին առաջադրում, եւ ստիպված՝ բոլորն ընտրում էին այդ թեկնածուին։ Արմեն Մելիքբեկյանը, որը շահագրգիռ կողմ է, ինքն է նախապատրաստել ժողովը։ Բացի սա, ուղղակի զավեշտալի է, որ ամբողջ ժողովի ընտրակարգը մշակել է նրա տեղակալը՝ Արմեն Նիկողոսյանը։ Նրանք կասեցրել են իրենց ոչ ձեռնտու ակումբների անդամակցությունը։ Այն ակումբների, որոնց չեն կարողացել համոզել, որ քվեարկեն Մելիքբեկյանի օգտին։ Իմ տեղեկություններով՝ այդ 9 հասարակական կազմակերպություններից 7-ը պատրաստ են եղել քվեարկելու Թովմաս Գրիգորյանի օգտին։ Քանի որ իրավունքն իրենց ձեռքում է, իրենք երեկ հիմնավորեցին, որ այդ կազմակերպություններն անդամավճար չեն մուծել։ Բայց արդյոք մյուս կազմակերպությունները մուծե՞լ են, թե՝ ոչ կամ ե՞րբ են մուծել։ Նախ կասեցնելու հարցը պետք է համաժողովում քննարկվի, իսկ այդ կառույցների ներկայացուցիչները պետք է ներկա լինեին ժողովին, բայց Արթուր Ազարյանի թեթեւ ձեռքով այնպես էր ընտրակարգը մշակվել, որ այդ կազմակերպությունները չլինեին դահլիճում»,- ասաց Բաղդասարյանը:
«Արդեն տեղեկություններ կան, որ Հենրիխ Մխիթարյանն ասել է, թե ինքը պատրաստվում է երկար ժամանակով հանդես չգալ հավաքականի կազմում։ Այսինքն՝ ինքնըստինքյան, հասկացվում է, որ հանդես չգա այնքան ժամանակ, քանի դեռ Մելիքբեկյանը ֆեդերացիայի նախագահ է»։ «Ֆուտբոլ+»-ի հիմնադիրը նշում է նաեւ, որ ՀՖՖ նորընտիր նախագահ Արմեն Մելիքբեկյանը խորամանկությունների է դիմել. «Երբ Արթուր Վանեցյանը հրաժարական տվեց, Մելիքբեկյանը չէր ասում, որ ինքն իր թեկնածությունը պատրաստվում է դնել, ընդհակառակը՝ ասում էր, որ թեկնածությունը չի դնելու։ Սա, իհարկե, խորամանկ քայլ էր»։
Կարեն ՄԱՐՏԻՐՈՍՅԱՆ
Հոդվածն ամբողջությամբ կարող եք կարդալ «Հրապարակ» թերթի այսօրվա համարում
