Ազգային ժողովն այսօր քննարկում է «Պետական կենսաթոշակների մասին» օրենքում լրացում կատարելու մասին «Լուսավոր Հայաստանի» օրինագիծը երկրորդ ընթերցմամբ եւ ամբողջությամբ ընդունելու հարցը: Օրինագծի հեղինակ, ԼՀԿ պատգամավոր Մանե Թանդիլյանը նշեց, որ գործող օրենքը սահմանում է՝ կենսաթոշակառուն անկանխիկ եղանակով թոշակը ստանալու համար վերջին 12 ամսում 1 անգամ պետք է բանկ ներկայանա. «Դրա հետ կապված շատ խնդիրներ կան կենսաթոշակառուների համար: Շատերն են ինձ դիմել այդ հարցով: Առաջարկում ենք լուծում. բանկը կենսաթոշակառուի՝ ՀՀ-ում գտնվելու փաստը եւ նրա ինքնությունը հեռահար կերպով կարող է հաստատել: Կարգավորումն ուժի մեջ է մտնելու ընդունումից երեք ամիս անց»:
Մանե Թանդիլյանը տեղեկացրեց, որ հայաստանյան 17 գործող բանկերից չորսը նման ծառայություն արդեն իսկ մատուցում են, եւս երկուսը պատրաստվում են. «Այս օրինագծի ընդունումը որեւէ ռիսկ չի պարունակում»:
Կառավարության դիրքորոշումն այս օրինագծի վերաբերյալ դրական է: Աշխատանքի եւ սոցիալական հարցերի փոխնախարար Սմբատ Սաիյանը հայտարարեց. «Առաջարկվող մոտեցումը համապատասխանում է կառավարության դիրքորոշմանը: Շնորհակալություն նախագծի հեղինակին եւ հանձնաժողովին, որովհետեւ օրենքը բերվեց այնպիսի տեսքի, որը բավարարում է բոլոր կողմերին»:
Կարդացեք նաև
Հավելենք, որ օրինագիծը դեռ պետք է քվեարկվի:
Քննարկվեց նաեւ «Իմ քայլի» մի խումբ պատգամավորների հեղինակած՝ «Պետական նպաստների մասին օրենքում» լրացում կատարելու օրինագիծը երկրորդ ընթերցմամբ եւ ամբողջությամբ ընդունելու հարցը: Այս օրինագծով էլ սահմանվում է՝ խնամակալության նպաստ պետք է տրամադրվի շուրջօրյա խնամակալության կարիք ունեցող մինչեւ 14 տարեկան անձանց (ավելի քան 400 անձ) խնամակալներին:
«Պետբյուջեի համար դա տարեկան 170 միլիոն դրամի պարտավորություն է առաջացնելու»,-հայտարարեց օրինագծի հեղինակներից «Իմ քայլի» պատգամավոր Նարեկ Զեյնալյանը:
Այս օրինագիծը, որի վերաբերյալ կառավարության դիրքորոշումը կրկին դրական է, եւս պետք է քվեարկվի երկրորդ ընթերցմամբ:
Լուիզա ՍՈՒՔԻԱՍՅԱՆ
