Կոտայքի մարզպետ Ռոմանոս Պետրոսյանն այսօր «Արմենպրեսի» մամուլի սրահում անդրադարձավ մամուլի այն հրապարակումներին, թե ինքն արձակուրդից հետո չի պաշտոնավարի, այլ նշանակվելու է տարածքային կառավարման եւ զարգացման նախարար, իսկ ներկա նախարարը՝ Սուրեն Պապիկյանն էլ՝ փոխվարչապետ: Ռոմանոս Պետրոսյանն այս առնչությամբ ասաց՝ նման առաջարկ չի ստացել:
«Նման քննարկում չենք ունեցել: Ես պաշտոնս փոխելու առաջարկ չեմ ստացել: Մարտի 13-ից գնալու եմ հերթական արձակուրդի՝ Սահմանադրական փոփոխությունների հանրաքվեի քարոզարշավին մասնակցելու»,-ասաց մարզպետը:
Ապա անդրադառնալով մարզպետարանի կառուցվածքային փոփոխություններին, ասաց՝ կան հաստիքներ, որոնք չեն համալրել, տարածքային կառավարման մասին օրենքով կառուցվածքային փոփոխություն է կատարվելու. «25% օպտիմալացում է լինելու»:
Մարզպետը մտադիր է «մաքրել» մարզի կասկածելի պաշտոնյաններին. «Համայնքի ղեկավարներն ու իրենց մերձավորները, ովքեր տիրապետում են մի քանի հարյուր հեկտար հողատարածքների, համայնքի ղեկավարները, որոնք սեփականացրել են գյուղի միակ վարչական շենքը՝մանկապարտեզը, համայնքի ղեկավարները, որոնք տիրապետում են ապարանքների, մեծ կապիտալի, բայց տվյալ համայնքում չկա մանկապարտեզ, մշակույթի տուն, ճանապարհներն անբարեկարգ են, իմ համեստ գնահատականներով՝ մսխել են տվյալ համայնքի զարգացման ողջ պոտենցիալը, մսխել են անպատիժ, մսխել են հովանավորված, մսխել են քվոտավորված, այլ մեխանիզմ չկա, քան դատարան դիմելը»:
Կարդացեք նաև
Մարզպետին էլ են դատի տալիս, ասաց՝ Կոտայքում միշտ թեժ է. «Իմ նկատմամբ էլ վարույթներ կան: Դպրոցներից մեկի տնօրենի ԺՊ-ին կարգապահական տույժի եմ ենթարկել, հայց է ներկայացրել՝ տույժը չեղարկելու»:
Ռոմանոս Պետրոսյանն ասաց, որ մարզպետարանի ենթակայության 90 դպրոցներից 60-ում կառավարման խորհրդի անդամներից մարզպետի երկուական ներկայացուցիչներին փոխել է: Ասաց՝ սա քաղաքականություն է, եւ երբ մարզպետը փոխվում է՝ իր ներկայացուցիչներին էլ պետք է փոխի: Եվ մարզպետի այս որոշումները նախկին մարզպետի նախկին ներկայացուցիչները վիճարկում են դատարանում:
Նելլի ԲԱԲԱՅԱՆ
