«5-րդ ալիք» հեռուստաընկերության սեփականատեր Արմեն Թավադյանի կալանքը երկարաձգելու վերաբերյալ նրա պաշտպանների բողոքի քննությունը ՀՀ վերաքննիչ քրեական դատարանում կշարունակվի մարտի 11-ին՝ 16:00-ից: Այսօրվա նիստը հետաձգվել է: Այս մասին լրագրողներին հայտնեց Թավադյանի շահերի պաշտպան, փաստաբան Արամ Օրբելյանը: Դռնփակ դատական նիստին Թավադյանը մասնակցել է:
«Հավելյալ կետեր, որոնք մեզ հայտնի են դարձել ավելի ուշ, առաջիկայում կասենք դատախազի ներկայությամբ: Այսօրվա նիստը հետաձգվեց, որպեսզի դատախազը հասցնի կարծիք հայտնի այդ նոր հանգամանքների մասին, որոնք նախաքննական գաղտնիք են, հիմա չենք կարող ասել: Մենք կներկայացնենք այդ նոր հանգամանքները»,-նշեց Արամ Օրբելյանը:
Հիշեցնենք, որ Արմեն Թավադյանը կալանավորվել է դեկտեմբերի 24-ին. մեղադրվում է Մարտի 1-ի դեպքերից տուժած անձանց կաշառելու փորձի համար: Ըստ ՀՔԾ-ի, Թավադյանը ձերբակալվել էր Ռոբերտ Քոչարյանի ենթադրյալ աջակից Վարուժան Մկրտչյանին առնչվող քրեական գործի շրջանակներում: Գործը նախաքննության փուլում է:
Լուիզա ՍՈՒՔԻԱՍՅԱՆ
