«Բացառված է, որ քննիչ հանձնաժողովի որեւէ փաստաթուղթ, արձանագրություն կամ տեղեկություն, որը պարունակում է պետական գաղտնիք, հայտնվի ինչ-որ օգտատիրոջ մոտ՝ անկախ նրանից, թե նա որ քաղաքական կուսակցության անդամ է»,-լրագրողների հետ զրույցում այսօր ասաց ապրիլյան ռազմական գործողությունների հանգամանքներն ուսումնասիրող ԱԺ քննիչ հանձնաժողովի անդամ, «Իմ քայլի» պատգամավոր Արմեն Խաչատրյանը:
Օրերս ԱԺ աշխատակից Գարիկ Ղազարյանը, որը պատգամավոր Արման Բաբաջանյանի քաղաքական շարժման ներկայացուցիչ է, իր ֆեյսբուքյան էջում գրել էր, որ տեսել է հանձնաժողովի զեկույցի արձանագրություններից, որոնցում հերքվում է ջրի, զենքի, փամփուշտի խնդիրը. «Բայց ես հո գիտեմ, որ բարեկամս երկու օր Ջաբրայիլում փչացած տանկի մեջ է մնացել»:
Արմեն Խաչատրյանը նշեց. «Իմ դիտարկումն է, որ Գարիկ Ղազարյանը, հետեւելով մեր մամուլի ասուլիսներին, լսել է, որ քանիցս անուղղակի կերպով ասել ենք՝ նախնական անհրաժեշտության առումով զենքի, սպառազինության խնդիր հենակետերում չի եղել: Այլ է հարցը, թե հետագայում ինչ է տեղի ունեցել համալրումների հետ կապված: Այ այստեղ խնդիր եղել է: Այն, որ տանկերում ջուր է եղել, մենք ասել ենք, որ այդ հանգամանքը չի հաստատվել: Կարծում եմ՝ Գարիկ Ղազարյանը հետեւություններ է արել հարցազրույցներից, ինչը որակել է «արձանագրություն» բառով: Արձանագրությունն արդեն իսկ փաստաթուղթ է, եւ այն չէր կարող հայտնվել ինչ-որ անձի մոտ»:
Կարդացեք նաև
Արմեն Խաչատրյանը նաեւ հայտնեց՝ ստուգում են անելու եւ փորձելու են հասկանալ, թե ինչ է նկատի ունեցել օգտատերը՝ «արձանագրություն» ասելով:
Ապա հավելեց՝ քիչ առաջ է հանձնաժողովի նախագահ Անդրանիկ Քոչարյանից տեղեկացել, որ Գարիկ Ղազարյանը հերքել է արձանագրության դրվագը:
Լուիզա ՍՈՒՔԻԱՍՅԱՆ
