Տավուշի մարզի Նոյեմբերյան խոշորացված համայնքի մի քանի գյուղերում խմելու ջրից թունավորման դեպքեր են գրանցվել: Թունավորվածների մեծ մասը երեխաներ են եղել:
Aravot.am – ի հետ զրույցում Նոյեմբերյանի համայնքապետ Կարեն Աբազյանը տեղեկացրեց, որ հունվարի 1-ից մինչև հունվարի 4-ը թունավորման նախանշաններով Նոյեմբերյանի բժշկական կենտրոն են տեղափոխվել համայնքի գյուղերի մոտ 15 բնակիչներ, որոնցից 11-ը անչափահաս երեխաներ են եղել, իսկ 4-ը՝ մեծահասակներ:
Համայնքապետի փոխանցմամբ՝ թունավորման աղբյուրը եղել է Ջուջևան բնակավայրը, որը մյուս համայնքներ տանող ճանապարհին է և ամենայն հավանականությամբ ճանապարհի եզրին գտնվող ջրի աղբյուրից անցորդները վերցրել են ջուրը, որից էլ եղել է թունավորումը։ «Հիմնական աղբյուրը եղել է Ջուջևանում, սակայն տեղում միայն երկու հոգի է թունավորվել, մնացած դեպքերը Կողբ, Ոսկեվան, Կոթի, Այրում և Բաղանիս գյուղերից են գրանցվել։ Ամենայն հավանականությամբ՝ բնակիչները ճանապարհին գտնվող աղբյուրից են օգտվել։ Ամեն դեպքում մենք հիմա գյուղի ջրային բոլորը խողովակները փոխել ենք, իսկ վաղն առավոտյան հակահամաճարակային կենտրոնի օգնությամբ ջրի մանրէազերծման և քլորացման աշխատանքները կկատարվեն, որից հետո՝ 2-3 օրվա ընթացքում, կվերականգնվի ջրամատակարարումը»,- նշել է Կարեն Աբազյանը։
Համայնքապետի խոսքով՝ բոլոր թունավորված անձինք ստացել են բժշկական օգնություն և մեծ մասն արդեն դուրս են գրվել հիվանդանոցից. «Միայն երկու հոգի է դեռ բժիշկների վերահսկողության տակ, սակայն նրանց վիճակն էլ կայուն է գնահատվում և երկու օրից նրանք նույնպես դուրս կգրվեն»։
Կարդացեք նաև
Աբազյանի փոխանցմամբ՝ հստակ պատճառ չի գտնվել ջրի մեջ առկա թունավոր նյութերի, սակայն ջրի հիմնական աղբյուրից սկսած՝ բոլոր խողովակները ուսումնասիրվում են՝ պատճառը բացահայտելու համար. «Հստակ չգիտենք պատճառը, սակայն հակահամաճարակային կենտրոնից մեզ ուղղորդել են ինչպես մանրէազերծման գործընթացն իրականացնել, մենք էլ ըստ ուղղորդման աշխատանքները կատարում ենք»։
Սաթենիկ ՀՈՎՍԵՓՅԱՆ
լուսանկարները՝ ՀՀ առողջապահական և աշխատանքի տեսչական մարմնի էջից
